有人話,大學係成個社會嘅縮影,真係一啲都冇講錯。香港房屋問題不斷惡化,唔單止無殼蝸牛一室難求,連大學生都要為「房事」頭痛,都咪話唔徬徨。

鄰近大學校園劏房索價近萬元,仍然有價有市。

大家都知,本港大學宿位一向供不應求,加上愈來愈多內地及海外學生來港讀書,大學宿舍更加短缺,未獲分配宿位嘅大學生自然要四出撲房,校園附近嘅私人住宅就成為搶手貨嘞。好似鄰近港大嘅西環咁吖,有唐樓業主將五百呎單位一拆三,面積約一百呎嘅劏房,月租九千五百大元,比大學宿舍貴近四倍,都咪話唔食水深。記者上去睇過呢啲劏房,地方淺窄不特止,設施亦非常簡陋,淨係得一張床、一張梳化、一部電視機咁大把,連煮食用具都欠奉。

咪睇小呢啲豆腐膶劏房吖,記者要求減租,業主一於企硬,話好多人排住隊要喎,直頭好似皇帝女唔憂嫁咁,真係唔到你唔服。

話時話,類似嘅「天價劏房」早就成行成市,好多招租廣告吹到天花龍鳳,又話全新裝修、無敵海景、免費WIFI,其實好多貨不對辦,而且月租閒閒哋成萬元,平均呎價拍得住山頂豪宅咁滯,一樣有價有市。點解會咁?好簡單啫,有需求就有市場,大學宿位長期供不應求,學生除咗任人「劏」之外,仲有咩選擇吖。呢,除咗港大之外,理大今個學年欠缺二千多個宿位,浸大亦欠缺一千多個宿位,部分院校新生成功申請宿位嘅比率只有七成,唔少學生被迫捱貴租,咪搞到連劏房都爭崩頭囉。

其實,為咗應對宿位緊張問題,各院校都做過唔少工夫,例如提供租務資訊以及室友配對服務等,可惜呢啲措施治標不治本,始終解決唔到問題。大家有眼見,興建大學宿舍同港府覓地建屋一樣,都係寸步難行。好似浸大咁吖,幾年前申請興建宿舍,點知等極都冇下文,有關地皮最後仲被改為興建豪宅添。一句講晒,政府一日唔增撥土地,大學宿位供應一日唔增加,學生就只能繼續捱貴租。

講起都好笑,前朝貪曾政府好大喜功,聲稱要發展教育產業,將香港打造成區域教育樞紐喎,點知家陣學生連宿位都難求,你話係咪搞笑吖。

正所謂,十年樹木,百年樹人。港產官僚目光短淺,連大學宿位咁簡單嘅問題都解決唔到,旨意佢哋樹人,蚊都瞓蛇都死喇,叮!