善心人何處尋覓 求肝漢望天打卦

太一叮講緊嘅，咪就係等緊換肝續命嘅肝衰竭病人李先生囉。佢早前獲安排進行換肝手術，點知因為捐贈者患癌而被迫中止，由希望變失望，嗰種徬徨同無助，實在不足為外人道。雖然連日來有超過二百名熱心市民表示願意捐肝救人，可惜暫時仲未搵到合適配對。而最可惜嘅係，本來有血型脗合嘅病逝者可以捐肝，最終因為家屬反對而告吹。

即係咁，身體髮膚受之父母，好多中國人相信死後要留全屍。但大家有冇諗過，捐贈器官唔單止可以救人，亦等於延續自己嘅生命，何樂而不為呢？本報舊年曾經報道一位患有心室擴張、等待換心手術嘅廿二歲後生仔不幸離世，家屬決定將佢嘅肝臟、腎臟等多個器官捐出，結果成功拯救五位病人。當時佢父母係咁講嘅，捐贈器官係唔想其他人重複佢哋嘅苦難，雖然冇咗一個仔，但就多咗五個仔女。冇錯嘞，就係呢個艱難而偉大嘅決定，唔止救咗五條人命，而且為五個家庭帶來新嘅希望，實在難能可貴，可歌可泣。

講開又講，隨着時代進步，器官捐贈喺好多地方早就唔係禁忌。例如加拿大等西方國家，市民簽署器官捐贈嘅比例超過兩成，反觀香港只得個位數字。至於器官捐贈者佔人口比例，西班牙、比利時等地都超過百萬分之三十，香港就只有百萬分之四，簡直相形見絀。正因為咁，本港等候器官移植嘅病人大排長龍，腎臟移植平均要等五至十年，最長甚至等咗超過二十年，導致唔少病人輪候期間含恨而終，講起真係可悲。

當然喇，器官捐贈除咗靠市民自覺，政府宣傳同教育一樣唔少得，外國嘅經驗好值得港府參考。好似澳洲政府咁吖，為器官捐贈者發放津貼，又鼓勵僱主提供有薪假期，等員工手術後可以靜心休養。德國就規定政府機構及醫療保險公司，向十六歲以上公民派發器官捐贈詢問表，民眾喺換領護照、身份證或駕駛執照時，亦會收到表格。而本港亦有人建議，器官捐贈者可獲優先編配公營骨灰龕位，以增加誘因，當局何不考慮呢？

其實，香港人一向有愛心，為善不甘後人，尤其係拯救人命咁有意義嘅事，更加唔應該例外喇，係咪！