升降機事故不斷 機電署累人累物
香港話就話係安全城市，其實得個講字嘅咋。唔信嘅，出街睇吓咪知囉，唔止危險招牌高高掛，病危樹木隨時塌，升降機事故更係無日無之。難聽啲講句，內地嘅升降機「食人」悲劇喺香港上演，可能只係遲早問題。
大家應該仲記得，上水天平邨兩年前曾發生升降機急墜事故，當時機電工程署煞有介事派員巡查，仲話會加強監管承辦商添。好嘞，兩年過去，升降機安全情況有冇改善呢？真係講都冇人信，情況唔單止冇改善，反而惡化，每月發生故障過百次，其中一幢大廈上月仲發生困升降機及疑似急墜事故，問你怕未。
屋邨法團係咁講嘅，其中三幢大廈嘅升降機自○七年開始由同一承辦商負責維修，自此大小毛病不絕如縷，「高峰期」每月故障多達四百次，升降機變跳樓機，居民唔驚就假。搞成咁，法團梗係更換承辦商啦，點知情況一樣冇改善，直至今個月法團再換承辦商，新公司檢查後，赫然發現三座大廈十八部升降機中，有八部出現十一項嚴重問題，包括主鋼纜損壞、井底保償裝置運作不良、限速器轆磨蝕等等，搞到唔係突然停機，就係唔識煞停，當中一部升降機嘅八條主鋼纜中，有一條仲明顯損壞添，冇爆大鑊係好彩咋。
好明顯，舊承辦商檢查馬虎，維修兒戲，搞到居民搭升降機好似搵命博咁，身為監管部門嘅機電署責無旁貸。但令人匪夷所思嘅係，機電署闊佬懶理不特止，仲擺明放生問題承辦商，把口就話承辦商保養不善，實際上全無檢控扣分行動，淨係一味要求新承辦商執手尾，有冇再離譜啲吖？
咁仲唔止，機電署職員曾多次陪同舊承辦商檢測升降機，次次都拍心口話冇問題，次次話口未完就出事，呢啲唔係失職係乜呢？唔怪得法團直斥機電署監管不力等五宗罪，計劃向申訴專員公署投訴。咁又係呀，全港升降機每日總乘客量接近三千萬人次，足足比港鐵多五倍，機電署監管咁粗疏，隨時累死人嘅咋。
話時話，近年升降機事故爆唔停，淨係去年北角升降機四條鋼纜全部斷裂，搞到多人受傷，就知當局嘅監管形同虛設。嗱，香港已經夠晒立立亂，鉛水風波未解決，電話騙案又摸上門，如果市民連出入平安都不可得，機電署仲有乜存在價值呀？不如早啲摺埋好過喇，叮！
