景點總係三幅被 拓展旅遊一味吹
啲人去非洲旅行最鍾意玩safari（獵遊），貪佢可以同珍禽猛獸零距離，夠晒刺激。其實計太一叮話齋，香港每逢打風落雨，唔係冧樹就係冧招牌，再唔係就水淹七軍或山泥傾瀉，成個冒險樂園咁，刺激過safari多多聲喇！
上述言論，純屬搞笑，如有雷同，實屬不幸，不過香港景點來來去去三幅被，對旅客缺乏吸引力，卻係鐵一般嘅事實。呢，旅遊界立法會議員尋日就呻到樹葉落，話自從開放個人遊以來，內地旅客錄得大幅增長，弊在港府喺開發旅遊景點以及增加旅客承載力上，冇做相應工作；亦有業界人士指出，香港獨沽購物一味，加上當局目光短淺，欠缺整體規劃，好似大嶼山咁，一味搞大型基建而唔提升整體吸引力，想吸客都難。
呢啲問題已經講咗N咁多年，早就唔係新聞咯。就講發展大嶼山，一時話搞賭場，一時話打造橋頭經濟，一時話發展水療度假村，一時話發展購物城，講到天花亂墜，點知次次都係講完就算，到依家十畫未有一撇。港府拓展新景點不力，由此可見一斑。
景點冇新意，旅客承載能力更加係乏善足陳。香港話就話主打購物，其實相關配套十年如一日，搞到旅客逼爆各區，你知啦，人頭湧湧，肩摩轂擊，擊吓擊吓好容易火星撞地球，激發衝突，中港矛盾好大程度就係咁樣引起嘅嘞。最好笑嘅係，業界一直爭取喺邊境開闢購物城，紓緩市區人流壓力，點知港府好似借咗聾耳陳隻耳咁，關人個關。雖然有人日前向城規會申請改變土地用途，購物城叫做有啲眉目，可惜已經先機盡失，購物城起得嚟分分鐘變明日黃花。
嗱，唔係靠嚇O架。內地陸續下調日用品進口稅，加上人民幣近期大幅貶值，大大影響內地客來港消費意欲。只要落去銅鑼灣等旺區兜一轉，水盡鵝飛，吉舖通街都係，就知情況幾咁惡劣。春江水寒鴨先知，展望下半年零售數字，業界已經打定輸數，預料將會繼續下跌咁話。
講真，旅遊業問題多多，又點止景點缺缺、設施殘舊咁簡單吖。不良商舖劏客，激進團體搞事，呢啲問題一日唔解決，即使外圍環境好轉都冇用嘅咋。不過話又講番轉頭，香港競爭力每況愈下，遲早由國際大都會變番昔日小漁村，別有一番韻味，唔愁吸引唔到旅客嚟憑弔啦，叮！
