政壇：施穎茵做滙豐港區新一姐
滙豐香港區總裁之前「馮姐」馮婉眉個位，公布咗由滙豐另一位女將頂上，下月一號由現任滙豐香港區零售銀行及財富管理業務主管施穎茵（Diana Cesar）升任。
施穎茵（左）頂咗馮婉眉（右）個位，下月一號升任滙豐香港區總裁。（資料圖片）
Diana喺滙豐做咗十五年，最記得係佢○六年出任亞太區存款及按揭主管，一上任就力推全港最低P按利率，掀起全城按揭減價戰。Diana當年成功幫滙豐重奪畀中銀香港搶走嘅市場份額，佢大刀闊斧作風，為佢贏得「按揭一姐」稱號，之後喺一一年升任香港區零售銀行及財富管理業務主管。
下月Diana升做滙豐港區一姐，之後佢將會向滙豐大中華區行政總裁Helen黃碧娟彙報。Helen話好開心亞洲最核心嘅香港區CEO位由Diana坐。
諗番起，馮姐喺一月公布離職，當時滙豐內部同時公布馮姐離任同Helen嘅新任命，Helen當時由滙豐中國副董事長、行長兼行政總裁升上大中華區總裁，市場當時難免會將佢哋兩位嘅去留連埋嚟諗。依家滙豐人事安排塵埃落定，馮姐近期亦公布做港交所董事同恒隆地產獨立非執行董事，咁都叫作告一段落。而話時話，滙豐都真係幾旺女將噃！
