淫媒侵權上癮 港府姑息養奸

冇錯嘞，太一叮講緊嘅之唔係壹淫媒囉。佢哋長期侵犯東方報業集團知識產權，案例仲厚過電話簿。好似今年三月咁吖，壹傳媒旗下《蘋果日報》網站一段影片刊載一張無綫電視女藝員蔡思貝同另外四名男藝員嘅照片，原來呢張照片舊年九月已經喺東方報業集團旗下嘅東網刊登過，版權屬於東方。正所謂，不問自取，是為賊也，壹淫媒順手牽羊，將東方嘅照片據為己有，擺明侵犯知識產權喇。

東方發現版權受到侵犯後，今年五月透過律師入稟區域法院，控告《蘋果日報》網站所屬嘅壹蘋果網絡有限公司侵犯照片版權，要求法庭頒發禁制令禁制被告作出侵權行為，命令被告交出有關照片，並就侵權一事向東方賠償，以及按照《版權條例》作出額外損害賠償。由於鐵證如山，無可抵賴，壹淫媒惟有跪低求和，向法庭繳存二萬零一元作為「附帶條款付款」及支付二萬一千元律師費。

小數怕長計，過去十九年壹淫媒不斷侵權，向東方賠償或繳款法庭嘅金額，累計超過一百三十萬元，都可以話係前無古人咯。自從九五年壹淫媒旗下《壹本便利》擅自使用《東方日報》有關扑頭黨嘅報道同相片被侵權，自動向東方賠償一萬二千元求和後，類似侵權行為就陸續有來，幾乎成為家常便飯。最離譜嘅係，淫媒做文抄公，校對都慳番，試過連錯別字都照登可也，唔到你唔服。你話嘞，淫媒侵權後求和，求和後又侵權，周而復始，不斷循環，話唔係侵權侵上癮都冇人信喇。

講到呢度，大家應該知道點解壹淫媒近年頻頻裁員，除咗因為經營不善，愈做愈縮，更加因為不勞而獲，經常將人哋刊登過嘅文章同照片據為己有，咁仲使請記者咩，搵幾個人剪剪貼貼咪得囉。

所以話，一次做無賴，永遠係無賴。咁多年嚟，「東方做、蘋果盜」已經成為常態，奇就奇在執法部門對侵權行為一直聽之任之，對侵權慣犯百般縱容，你話係咪匪夷所思吖？其實唔單止侵權行為受到包庇，壹淫媒宣淫販賤，犯案纍纍，罄竹難書，港府咪又係一次又一次放生。

都係古人講得啱︰禁而不止，則刑罰侮。壹淫媒橫行無忌，為禍香江，皆因港府姑息養奸嘅咋，叮！