開學使費家長愁 鉛水威脅更添憂

點解咁閉翳？之唔係為撲水囉。有政黨調查發現，超過六成受訪家長認為今年嘅教科書比舊年貴，其中近兩成中學家長花四千元以上為子女購置教科書。咪以為淨係中學課本乸脷，幼稚園課本一樣唔嘢小，三成半幼稚園家長呢方面嘅花費高達五百至一千元，問你怕未。

冇計喇，唔可以輸喺起跑線上吖嘛，幼兒教育點可以慳皮呢。今時今日學前班已經係基本動作，上到幼稚園，書簿費只係頭盤，話就話有學券，其實家長至少要補貼逾萬元費用，跟手仲有校服、校巴、生日會甚至遊學團，一闊三大，普通家庭都未必頂得順，更何況基層家庭。嗱，不妨睇吓另一項調查，近九成低收入家庭承認支付子女學習開支有困難，其中近半受訪者要食少餐當幫補；兩成甚至要向親友借貸，你話係咪閉翳吖。

正所謂，再窮不能窮教育，特別係港府肥到着唔到襪，紓緩家長壓力更係義不容辭，有人建議港府為基層學童設立課外活動津貼，以及將書簿津貼擴展至幼稚園，唔該官老爺認真諗諗佢。不過咁，呢個政府出名善財難捨，各界爭取學前免費教育多年，當局到依家仲係拖得就拖，你話家長唔嬲就假咯。

當然啦，開學關難過，「撲水」事小，「鉛水」威脅先至大鑊。家陣愈來愈多學校中招，對於點樣保障學生健康，教育局進退失據，一時話唔鼓勵學校自行驗水，一時要求學校留意驗水嘅方法同準確度，一時話最直接見效嘅方法係加裝濾水器，五時花六時變，家長同學生一頭霧水，無所適從。

咁都未算，有新建嘅公屋因為食水含鉛超標，而要全面更換喉管，入伙日期被迫押後，原本幫子女報讀當區學校嘅家長大失預算，小朋友隨時要跨區上學。你話嘞，如果唔係港府監管不力，導致鉛水風波一發難收，點會搞成咁吖。

有人話，養大一個小朋友需要四百萬元。大家有眼見，淨係讀書一瓣都已經咁多嘢煩，再加上食水污染，空氣混濁，整個環境烏煙瘴氣，衣食住行無一安心，就算坐擁四百萬元都冇用喇，叮！