問責高官懶開會 行政立法累鬥累

呢，本報翻查一四至一五年度十八個立法會事務委員會嘅會議紀錄，發現司局長出席率低到離譜，有「傻強」之稱嘅財經事務及庫務局局長陳家強最懶，喺八次財經事務委員會會議中，只出席過一次，仲衰過「立法會三蛇」近三成嘅出席率，問你服未。

其他問責官員又點呢？好似「政改三人組」成員嘅律政司司長袁國強同政制及內地事務局局長譚志源咁吖，神龍見首不見尾，前者喺九次司法及法律事務委員會會議中只現身兩次，後者喺十二次政制事務委員會會議中同樣現身兩次，而且齊齊缺席兩場政改公聽會，你話係咪離譜吖？

綜觀所有問責高官，出席率低於五成嘅包括張炳良、陳茂波、黎棟國、張建宗、蘇錦樑，連同上面嗰三位懶蛇，幾乎佔咗成個問責團隊一半，都咪話唔誇張。大家可能會問，邊個代替問責官員出席會議？咪就係副局長及常任秘書長、副秘書長囉。話就話養兵千日，用在一時，佢哋代上司「受靶」係職責所在，但正如學者話齋，佢哋並非問責官員，既唔夠權威，亦缺乏代表性，做法並唔理想。

冇錯嘞，話明係問責官員，就要向立法會及市民負責，次次派手下充撐場面，擺明敷衍塞責啫。港府當年推行高官問責制，其中一個目的就係由政治任命嘅司局長出席立法會會議，面對議員質詢，以免政治中立嘅公務員難做，點知呢班司局長蛇得就蛇，推得就推，結果一樣要由公務員出面，既然係咁，不如索性取消高官問責制仲好喇。

難為港府口口聲聲要修補行政立法關係，班高官連會議都唔肯出席，又點樣修補關係呢？當然喇，立法會議員亦要檢討吓自己，尤其部分反對派政客唔係拉布就係流會，唔係爆粗就係擲物，搞到立法會烏煙瘴氣，係人都怕怕喇。

最估唔到嘅係，被指經常周遊列國嘅教育局局長吳克儉，喺立法會教育事務委員會會議嘅出席率竟然係百分百；而已經被炒嘅民政事務局前局長曾德成及公務員事務局前局長鄧國威，喺相關委員會嘅出席率亦超過八成。勤力嘅被炒，偷懶嘅冇事，唔通劣幣驅逐良幣？官員懶惰成性，議員不務正業，行政立法累鬥累，香港點可能有運行吖，叮！