奧尼爾香港行被逼婚！「巨無霸」奧尼爾前日抵港，為米克米拿創立的能量飲料擔任宣傳大使，昨日更玩轉港九周圍搞搞震，於香港街頭大派笑蛋。這位43歲NBA名將全程被Deep V女友Laticia嘜實，後者更向記者坦言等做「巨無嫂」，公開逼婚喎！奧尼爾，識做啦！

「巨無霸」奧尼爾高舉少女，Man到爆！

米克米拿以親筆簽名向讀者問好。

今次奧尼爾訪港有美女相伴，女友Laticia無論髮型及輪廓，都有7成似哥倫比亞天后夏奇拉，「巨無霸」認真「識食」！「跟得夫人」Laticia昨早以一身Deep V造型陪同男友出席記者會，受訪時表示想瘋狂購物及拜大佛的她，被問到何時做「巨無嫂」時一臉冧樣回應：「呢個問題要問佢（奧尼爾），佢仲未向我求婚，希望呢幾年內啦！」

買旗袍講價成功 Laticia夠慳家

女友逼婚，奧尼爾是時候成家立室，不過曾4奪NBA冠軍指環的他，依舊大細路「冇時停」。身家億億聲的奧尼爾昨午踩落旺角，手執港女隨身法寶「芭蕉扇」行女人街，惹來哄動。「巨無霸」之後轉戰波鞋街及百利達商場，連環踩入波鞋舖、藥房、氣槍舖及音響器材店，一度將治療灰甲藥物及耳筒拎上手，但就表明只想入舖涼冷氣，齋睇冇幫襯，勁混吉！

至於Laticia就於女人街買了一件旗袍，期間更講價成功以約二百港元成交，又慳家又精明，Laticia娶得過啦，奧尼爾！

圖/文：方傑、植詠珊