善有善報，惡有惡報。人稱淫賤黎嘅壹淫媒前主席黎智英向泛民秘密捐款醜聞已曝光超過一年，醜聞主角之一、社民連主席兼立法會議員梁國雄日前終於被廉政公署請去飲咖啡，睇嚟單案應該有啲眉目嘞啩。正如「東方報業民意調查」顯示，市民強烈不滿黑金事件重挫香港廉潔形象，如果當局繼續姑息養奸，唔止港府管治威信掃地，連香港嘅法治招牌都會不保吖。

本報去年七月取得多份密件，踢爆淫賤黎過去幾年向不同泛民團體及個人秘密捐款逾四千萬元，其中五名泛民立法會議員分別收取三十萬元至一百五十萬元，而且從未依法申報，引起全城嘩然。可能民憤太大啩，廉署不敢怠慢，速速立案調查，突擊搜查淫賤黎及其洋助手嘅住所，而李卓人等被指收取黑金嘅泛民亦先後被廉署約談，可惜至今未有下文。家陣輪到長毛被廉署請飲咖啡，仲足足逗留三粒半鐘，你話唔係身有屎都冇人信喇。

正所謂：受人錢財，替人消災；受人黑金，埋沒良心。政客收咗淫賤黎嘅錢，仲係通過淫賤黎身邊一個有美國軍方情報背景洋助手，唔怪得佢哋咁鍾意反中亂港喇。講真，壹淫媒蝕錢蝕到趴街，旗下刊物唔係執笠就係裁員，淫賤黎自身難保，邊有咁多閒錢捐畀政客吖，政治黑金究竟乜嘢來源，畫公仔唔使畫出腸喇。

有立法會議員就講得啱嘞，淫賤黎秘密捐款唔單止有根有據，而且「有埋收據」，如果執法部門唔敢揸正嚟做，實畀人話怕咗外國勢力。嗱，人同此心，心同此理，上述民調顯示，兩成七受訪者直言黑金醜聞涉及外國勢力，當局唔敢告；兩成不滿調查畏首畏尾；兩成三直指當局有政治考慮。可見公道自在人心。

港府投鼠忌器，查案一拖再拖，處理淫賤黎黑金醜聞係咁，處理前特首曾蔭權同前廉政專員湯顯明「絕代雙貪」案又係咁，廉潔指數點會唔跌跌不休吖。民調又顯示，若案件最終不了了之，三成七受訪者坦言會對香港廉潔失信心；一成七認為廉署形象受損；仲有一成九相信秘密捐款情況會持續，唔係無的放矢o架！

點講都好，傳媒發揮第四權監督功能，令政淫勾結無所遁形，唔該當局速速做嘢，將反中亂港者繩之以法，如果繼續拖泥帶水，唔止進一步破壞法治，亦會激起民憤，盞自己攞嚟衰嘅咋，叮！