城中鏡：花旗伍燕儀教小學生理財
有啲嘢係要自細教落，鋼琴、小提琴、Ballet、畫畫、法文、西班牙文、網球、朗誦呢啲，Sorry，通通唔係；從細就要教嘅，係正確理財觀念。大咗唔識理財，何止仔女後悔，家長肯定更後悔。查實教小朋友理財唔簡單，連湊慣億億聲上落大客嘅Banker一樣考起。
伍燕儀教小學生理財，竟然勁緊張。
話說花旗銀行搞活動教小學生理財，佢哋環球個人銀行服務香港區總經理Angel伍燕儀尋日就教班小學生點記帳，鼓勵佢哋記錄低至少三個月嘅開支同收入養成習慣。
見開大場面嘅Angel竟然話，對住小朋友幾咁緊張，話驚班小朋友聽唔明佢講乜嘢喎。
