年棄月餅百五萬 身在福中不知福

嗱，環保團體近日就月餅消費模式進行調查，發現受訪家庭去年平均購買二點二盒月餅，約七成係送禮，近九成有收過親友及社區團體贈送嘅月餅。另一方面，五成四受訪者承認去年有食剩月餅嘅情況，平均每戶食剩一點二個月餅，當中只有一成四人會捐贈到社區團體或食物回收機構，三成半人將月餅直接丟棄。

唔講唔知，去年全港丟棄嘅月餅多達一百五十萬個，環保團體預計今年亦差唔多，都咪話唔誇張。呢啲月餅大部分未過期，只係因為過咗中秋，就被人當垃圾送去堆填區，唔止浪費，直情係折墮。廣告都有話啦，「大嘥鬼」眼闊肚窄，人見人憎。喺現實中，「大嘥鬼」幾乎成為香港人嘅代名詞，講起都羞家。

冇錯，禮多人不怪，中秋節送月餅無可厚非，但正如環保團體話齋，表達心意有好多方法，唔一定要送月餅嘅啫，反而多啲陪伴長輩，關懷親友，更切合人月兩團圓嘅意義。再講吖，施比受更有福，與其將食剩嘅月餅當垃圾丟棄，點解唔分甘同味，送去社區組織或老人院呢？

開講都有話，有食唔食，罪大惡極。世界上仲有好多人捱緊餓，香港係富裕社會，唔使捱餓已經好幸福，仲要浪費食物，即係身在福中不知福啫，因住畀雷劈呀。就算唔講浪費呢筆，丟棄月餅都唔環保喇，三個堆填區已經接近飽和，加埋咁多月餅，想唔滿瀉都幾難，即使擴建亦搞唔掂。所以話，為人為己為香港，千祈咪做大嘥鬼吖。

講番轉頭，香港人之所以浪費成性，除咗環保意識低落，同港府無所作為亦有關。當局年前大鑼大鼓推行「惜食香港運動」，點知作為政府部門嘅食環署冇積極配合不特止，仲拒絕喺轄下街市搞剩食回收，任由每日十幾噸剩食白白浪費，有冇再離譜啲吖？至於所謂廚餘回收措施更係講多做少，淨係興建廚餘回收中心咋，講咗N年都未有下文，等得嚟蚊都瞓喇。

都係嗰句，有時當思無時苦，好天要積雨來糧。香港係福地，唔會發生饑荒，但幸福唔係必然嘅，政府又好，市民又好，身在福中要惜福，千祈唔好浪費食物吖，叮！