今時今日，一句「贏在起跑線」，令許多小朋友的童年就只有補習或「11個興趣班」，有些更成為了父母跟別人比較、甚至炫耀的工具。「唔係話我做爸爸做得好叻，畢竟我都仲係初哥，但如果令到我個仔嘅童年唔開心，又或者長大之後好衰格又冇誠信嘅話，咁畀你喺起跑線贏晒又點呢？」球圈公認「好爸爸」的陳偉豪表示。圖/文：大頭

陳偉豪與兒子

在球場上表現勇猛的陳偉豪，無論是攔截對方球員或是上前助攻，作每一個決定都十分果斷，毫不猶豫；相比下，教仔、湊仔時就謹慎得多，幾乎作每一個決定前都諗過度過。「我踢波踢咗十幾廿年，足球員就係我嘅專業，我好有信心唔會咁易做錯決定！相反，我個仔『景堯』今年先5歲，即係我做爸爸嘅日子仲係好短，對住佢我好多嘢都唔會同唔敢亂嚟，因為我深信為人父母只要做唔啱一、兩次決定，對子女嘅影響將會好深遠！」「偉豪」道出他當爸爸之道，各位「爸爸」覺得啱聽嗎？

兩公婆分工清晰

景堯自理No Problem

南華剛於亞協盃賽和馬超盟主柔佛DT，南華能夠抵擋得住主隊的狂攻，全賴後防線上有陳偉豪和他的最佳拍檔保贊；而陳景堯在過去兩年三奪「品學兼優」獎，則全賴家中有「偉豪」和他的超級Partner老婆Hana。「球場上唔同位置有唔同責任，喺屋企我同老婆都一樣，特別係我一年總有幾段日子唔喺香港，同老婆嘅分工就更加緊要喇。」「偉豪」謂平日跟囝囝功課和溫習的重任就由Hana負責，Hana亦會分配一些小家務要求「景堯」協助，例如洗菜，目的是為了：「上網睇到話中學生唔識裝飯、剪腳甲同綁鞋帶？有冇搞錯？起跑線唔包自理能力o架？呢啲都搞唔掂就幾叻都冇用啦！贏喺邊呀？就算屋企有請外傭姐姐幫手，『景堯』都要幫手做家務。」

每周「決戰大富翁」

增進感情 學習理財

至於「偉豪」自己，除平日送返學、接放學外，和「景堯」一起閱讀、踢波、操練、游水和午睡，都屬這位「好爸爸」On Duty時的「職責」，他說：「兩仔爺有時就算落街行吓，傾吓偈，已經可以好快樂。傾多啲偈，唔止關係會好啲，少咗隔膜，佢有咩開心唔開心，我好容易就知道；佢亦好敢向我表達自己嘅情緒，咁係好事嚟。」「偉豪」表示，一家三口「決戰大富翁」亦係家中每周必備節目，「玩嘅過程大家不停吹水，爸爸喺邊區長大、媽咪喺邊頭返工、『景堯』大個想住邊頭，感覺好好，仲可以教埋佢理財，好正o架！」「偉豪爸爸」笑謂。

暑假快將完結，問到「偉豪」暑假期間有安排「景堯」去補習嗎？「補習？放假補習？K2升K3咋喎！我哋有幫佢報班，但全部都係佢自己揀，游水、踢波、跳舞，全部佢自己決定。做人愈大就愈冇得玩、冇咁易開心，咁點解依家唔畀個5歲人仔開心啲玩？」「偉豪」話畢，「景堯」即席表現勁舞，又跳得幾好睇喎！