高鐵一延再延 究竟幾時通車
明日復明日，明日何其多。高鐵工程延誤早就唔係新聞，但究竟要延到幾時，居然冇人講得埋，問你服未。
高鐵工程一延再延，通車遙遙無期。
嗱，運房局日前向立法會提交嘅文件顯示，截至今年六月底，高鐵整體工程僅完成約七成一，較一七年開通時間表預計嘅進度七成七，又滯後近六個百分點，即係一延再延咁解，連港府都承認情況嚴峻。
咁都未算離譜，如果逐項工程計，部分情況更加嚴重。例如西九總站嘅車站結構混凝土整體澆灌量，距離原定工程時間表嘅五成八相差十八個百分點，都咪話唔誇張。一延俱延之下，該車站出入口鋼結構組件嘅安裝工程亦受到拖累，淨係呢項工程就令成個高鐵項目推遲至一八年第一季先可望完工，到時會唔會再延期，冇人敢寫包單。
點解會搞成咁？文件指主要係個別工種持續未能達標喎，至於點解未能達標，就完全冇交代。其實係人都知，港鐵管理甩漏，港府監管不力，咪就係高鐵工程一延再延嘅主要原因囉。
話時話，港鐵上月向港府提交高鐵工程最新報告，表明通車日期由一七年底押後至一八年第三季，工程造價亦由原來六百五十億元飆升至八百五十三億元，筆數到底由邊個孭，到依家都未有定案。表面上港府擺出強硬姿態，聲稱唔會輕易負起財政責任，仲話會循法律途徑追討損失添，其實係做戲咁做，掩人耳目嘅咋。高鐵工程騎虎難下，港府唔負責，唔通淪為爛尾工程咩，最後咪又係由納稅人埋單。
最大嘅問題係，今時今日社會高度政治化，就算港府肯孭起呢筆爛帳，亦未必可以過到立法會呢一關。大家都知，追加撥款必須得到立法會通過，到時反對派固然會乘機玩嘢，建制派亦唔敢輕易放行，阻得兩阻，隨時又要再押後通車都似。
衰開有條路，除咗高鐵一延再延，其餘幾條新鐵路線亦唔好得幾多。南港島線至今仲未能追回早前嘅滯後，沙中線亦比原定進度滯後七個百分點，而觀塘線延線原定明年中全線通車嘅機會亦微乎其微。講起真係令人唏噓，以前香港出名速度快效率高，就算玫瑰園計劃咁龐大嘅項目，一樣話做就做，絕無拖泥帶水，點知家陣淪落到咁嘅地步，所有基建都延誤，所有基建都超支，再咁落去，就算有金山銀山，都遲早畀港府敗晒喇，叮！
