停機坪自出自入 十足十無掩雞籠
武俠小說話齋︰最安全嘅地方往往最危險。唔係冇理由o架，好似香港機場咁吖，保安工作原本應該做到滴水不漏，點知事實啱啱相反，保安甩甩漏漏，十足十無掩雞籠，睇見都怕怕喇。
唔係靠嚇o架。本報踢爆，負責本港機場客運及貨運安檢嘅機場保安有限公司，最少四名保安人員喺香港空運貨站當值期間疑似瞌眼瞓，有人甚至索性將雙手攤喺高架台上，不知幾輕鬆。咁都未算吖，貨運站其中一道閘門居然無人看守，載貨車輛毋須檢查就可以長驅直入禁區範圍；即使有人把守，亦係闊佬懶理，由得車輛自出自入，問你怕未。
咪以為呢啲係小事呀，空運貨站每日處理大量貨物，距離停機坪只有一步之遙，如果有不法分子將危險品偷運入禁區，隨時影響航班安全，後果不堪設想。
最離譜嘅係，咁大嘅保安漏洞擺喺眼前，機場保安公司仲一味死撐，話除咗一個閘口懷疑因員工疏忽而無人看守，其餘都係因為保安人員因工作需要而離開崗位，並且喺三百米範圍內進行其他工作喎。一聽就知係狡辯喇，唔怕一萬，最怕萬一，機場安全非同小可，保安人員瞌眼瞓，安檢大玩空城計，一個唔好彩畀歹徒潛入，到時邊個孭鑊先？
話時話，機場保安千瘡百孔，又點止呢單吖。本報舊年踢爆有保安人員懷疑掛住玩手機，保安當局派臥底旅客放蛇，帶同內藏利刀嘅手提行李進入禁區，保安人員居然懵然不知；又試過有背囊客穿越機場離境大堂職員通道安檢，接受X光檢查時，淨係放低隨身物品，連人帶袋經過金屬探測器，一樣掂行掂過；甚至試過有人大模廝樣走入捷運系統管道，結果搞到系統癱瘓幾粒鐘，七國咁亂。機場安檢似有若無，形同虛設，到依家都冇出事只可以話係好彩咋。
曾幾何時，香港機場享譽全球，旅客無不稱讚，可惜時移勢易，隨着服務質素下降，加上烏龍百出，香港機場國際排名好似食咗瀉藥咁，跌跌不休。鬼咩，連最基本嘅保安都搞到一鑊粥，旅客安全毫無保障，排名唔跌至奇喇。
始終都係古人講得啱，弗備難，難必至。依家話就話係和平時期，其實世界一啲都唔太平，恐怖組織無處不在，恐襲陰霾揮之不去，港產官僚再唔堵塞保安漏洞，加強安全措施，盞開門揖盜嘅咋，叮！
