兩文三語唔得掂 香港憑乜同人爭

港大社會科學研究中心研究發現，喺受訪嘅二千多名市民當中，八成半表示職場上以使用英語為主，而運用普通話嘅亦不在少數。語文水平方面，廣東話係母語，除咗愈來愈多人滿口懶音之外，基本上唔會有大問題。至於英語，四成人信心爆棚，自評程度良好，但真正接受測試後，只有百分之一點五受訪者達高階水平。普通話叫做好少少，但都係得三成半人達高階水平啫。

係人都知，英語係全球通行嘅國際語言，而內地作為全球第二大經濟體，普通話嘅重要性亦毋須多講，香港人兩瓣都唔掂，你話幾蝕底吖。睇吓人哋新加坡，社會同樣係以華人為主，英語、普通話同廣東話不知幾流利，加埋馬來、印度語人才，簡直係左右逢源，東西通吃，香港完全冇得揮。

所以話啫，提升語文水平，事在人為，特別係從教育着手，由細打穩根基。可惜吖，香港教育制度五時花六時變，淨係教學語言，一時母語教學，一時語言微調，再唔係就英中落車，直頭當正家長學生係白老鼠，咁搞法，語文水平唔打倒褪至奇。

先天不足都算嘞，後天失調先至攞命。曾經有英語培訓機構大吐苦水，話在職學生由十年前佔七成，減到依家得番四成；反觀內地，學習英語蔚然成風，只要睇吓年前嗰部以內地著名補習社為原型嘅合拍片，就知道內地英語熱嘅瘋狂程度。早排有調查發現，本港在職成年人英語水平首次被北京、上海同天津等內地城市爬頭，依家知點解喇。

最慘嘅係，港人唔夠人講，書寫能力亦令人搖頭嘆息，只有兩成受訪者英文書寫能力達良好程度，運用簡體字能力達良好級別嘅，亦只有三成。負責調查嘅學者建議港府制訂繁簡字讀寫能力框架，增加市民對簡體字嘅認識。學者係就係苦口婆心，但今時今日中港矛盾咁激烈，之前中環某著名酒店加入簡體字告示，都鬧出一場茶杯裏的風波，如果港府真係推廣簡體字，分分鐘又搞出一場反國教運動都似。

點講都好喇，家陣已經係地球村時代，港人繼續故步自封，抱殘守缺，搞到中不成、英不就，遲早淪為地球村嘅孤兒嘅咋，叮！