太一叮不嬲鍾意周遊列國，但以後就未必敢到處去咯，點解？恐怖襲擊浪潮席捲全球，固然得人驚啦，但太一叮覺得天下間最牙煙嘅地方，反而係香港機場呀！
話說《太陽報》及《東方日報》率先獨家踢爆民航處豪花十五億元購買新空管系統，拖足四年，到依家都未用得。不過古語有云：「禍兮福所倚，福兮禍所伏。」有消息人士爆出，七月底新空管系統測試時，因飛行數據處理系統故障，成個系統跪低，死足一晚至整番好。嘩，好彩呢套系統未真正運作啫，否則容乜易搞到天上嘅飛機變晒「無腳嘅雀仔」降落唔到，咁咪死得人多！
唔好話危言聳聽，據講飛行數據處理器主要係畀交通管制人員更新以及監察航機嘅飛行狀況，例如航路、飛行高度、飛行速度等等，由於軟件有重大缺陷，即使空管人員輸入簡單指令，隨時即刻死機。
咁都未夠恐怖，有資深空管人員曾接受新空管系統三輪嘅適應訓練，發現系統問題多多，全部唔符合安全標準！至今仍然無改善，問你怕未？
奇就奇在，呢套新系統講就天下無敵，實情只得三個地方用緊咁大把，水皮到其中一個印度機場都知驚，打算唔再用。弊在民航處管理層都知呢套系統唔掂，仍然一意孤行要喺處長羅崇文出年退休前啟用。叮！空管系統豈可兒戲，為咗一個人好大喜功去攞人命嚟較飛，有冇再荒謬啲呀！
太一叮諗極都唔明，香港話晒叫國際大都會吖，因乜解究安全意識會差過印度，你拎幾千蚊出嚟買部新智能手機，發覺「睇得唔用得」，會唔會「骨」一聲吞咗佢吖？
鬼咩，羅崇文當正自己係「山寨王」，使乜同納稅人慳吖，所以呢，佢向來好捨得大花筒，譬如將民航處新大樓改建成豪華娛樂城畀自己及太太享用。上樑不正下樑歪，佢仲包庇高層人員違規喺空管中心內使用手機，吹得佢脹咩？
一路以來，民航處出名叫「醜聞處」，搞到審計署狂數「十宗罪」，立法會帳委會用「強烈譴責」勁插民航處係「獨立王國」，今劑終於到申訴專員公署開埋聲表示關注，之但係以羅崇文面皮咁厚，應該都當係耳邊風咯！
計太一叮話齋，香港暫時未爆出特大航空事故，只係福大命大夠晒好彩咋。再唔整頓民航處，睇怕外國都要對香港機場發出「旅遊警示」呀，叮！
第一手消息請下載on.cc東網
