孔子主張有教無類,認為每個人都有權接受教育。講就咁講咯,可惜香港教育愈來愈商品化,愈來愈貴族化,搞到直資學校收費年年飆升,基層子弟只能望門興嘆,所謂有教無類早就成為歷史囉。

唔係誇張o架。今年全港七成半私校及六成二直資學校獲教育局批准加學費,其中五間私校及一間直資學校加費超過兩成,最高嗰間加幅兩成九,問你怕未。有私立英文小學調整學費後,每年收七萬四千多元,仲貴過大學多多,基層家庭固然望都唔敢望,連中產階級都話負擔唔起,咁唔係貴族化又係乜吖?

話時話,私校同直資學校予取予求,早就唔係新聞咯。有家長組織批評當局把關不力,削弱家長選擇權,亦有人要求為學校加費設定上限,呢啲意見唔係冇理由,可惜對牛彈琴,講咗等於冇講。呢,教育局今年分別接獲五十間私校及四十五間直資學校加費申請,結果有求必應,全部開綠燈,旨意官老爺把關喎,蚊都瞓蛇都死喇。

正所謂,名校大門八字開,有才無財莫進來。直資學校學費高唔在講,課外活動以至豪華遊學團嘅開支更加驚人,變相將基層子弟拒於門外。加上直資學校多數採取「世襲制」,好多學位留畀自己友,其他人只能望門興嘆。有人形容名校變成富人俱樂部,一啲都冇誇張。最離譜嘅係,直資學校一方面接受公帑資助,一方面無監無管,搞到亂象叢生,除咗審計署曾發表報告炮轟,連教育局前高官都承認政府對直資學校「無牙力」。

當然喇,教育淪為一盤生意,直資學校嘅亂象只係冰山一角咋。好似大學教育咁,資助學額僧多粥少,收生仲要向出得起錢嘅非聯招學生傾斜,唔怪得基層子弟入讀大學嘅比例愈來愈小喇。

曾幾何時,知識可以改變命運,基層子弟只要努力讀書就有機會脫貧,可惜時移世易,今時今日上流固然無望,靠讀書脫貧亦難過登天。好簡單,富家子弟可以讀名校及國際學校,甚至可以出洋留學,各適其適,而基層子弟根本冇得選擇,佢哋輸在起跑線上,跨代貧窮問題愈來愈嚴重,又有乜出奇吖。

事實證明,教育不公就係最大嘅不公,年輕人前景黯淡,上流無望,有乜法子唔愈來愈偏激,香港又有乜法子唔愈來愈亂吖,叮!

第一手消息請下載on.cc東網iPhone/iPad/Android/Windows Phone Apps