配套支援實在少 社區安老得啖笑

嗱，眼前就有現成例子嘞。長者社區照顧服務券計劃推行至今兩年，效果認真麻麻。有立法會議員指出，家陣有超過四成接受日間護理中心服務嘅長者，患有認知障礙症，但參與計劃嘅護理中心當中，只有七間提供相關服務，根本滿足唔到需求，建議社署增撥資源，喺各區設立專門處理有關患者嘅護理中心。

即係咁，港府當初推出社區服務券嘅原意，係幫助嗰啲身體機能評為中度缺損，以及正在輪候資助宿位嘅長者。問題係，點解呢班最有迫切需要嘅長者得唔到應有嘅照顧呢？港府增加宿位供應慢如蝸牛，一個唔該將個波交畀社區就當交咗功課，已經係卸膊，支援同配套不足，更加係雙重不負責任。計太一叮話齋，港產官僚係就係有膊頭，不過係「A字膊」──唔係，應該係「I」字膊至啱。

咁就唔怪得計劃推出以來，外界一直反應冷淡。喺參加計劃嘅二千一百多名長者中，只有約一千人仍使用服務券，六十二個提供服務單位當中，十六個服務長者不足十人，部分單位更加一個都冇，就知呢個計劃幾咁失敗喇。

所以話，社區安老說時容易做時難，唔係話畀少少津貼打發長者就得嘅。好似港府成日鼓勵人「居家安老」咁，係就係有「護老者津貼」，但係好多後生仔女為口奔馳，自顧不暇，好難全心全意照顧老人。再講吖，即使有心有力，冇相關知識一樣唔掂。港大前排喺長者院舍進行臨床評估，結果發現大部分照顧者對長者吞嚥障礙認知不足。試諗吓，連院舍專職人員都矇查查，普通人自己照顧長者，萬一發生意外，盞安老變虐老嘅咋。

仲有喎，港府一方面推動「居家安老」，話方便長者由家人照顧；另一方面又搞「北上安老」，將長者掟去冇雷公咁遠，你話係咪自相矛盾吖。最慘係港府向內地院舍買位後就關人個關，長者要自己應付內地高昂生活費同醫療費，隨時得不償失。大家睇到喇，港府開口埋口「老有所養」、「老有所依」，實際就講多過做，咪搞到唔湯唔水，不倫不類囉。

始終都係呢句︰他朝君體也相同，人人都會老，港產官僚視長者如包袱負累，小心收尾嗰幾年吖，叮！