政壇：創科界訪京 飛起莫乃光
行政長官創新及科技顧問楊偉雄盛傳將會出任創新及科技局局長，佢以榮譽團長嘅身份，聯同擔任團長嘅香港特區政府資訊科技總監楊德斌，帶住一班創新及科技界嘅人士，今日啟程到北京訪問。楊偉雄仍未出任創科局局長，但就帶團去北京，而呢個團嘅對口單位，更加有工業和信息化部、科投部、港澳辦等政府部門接見，加上隨團有大量本港創科界人士，猶如一個官式訪問團，可以話係於禮不合。
指拉布唔民主
一向對記者好慎言嘅楊偉雄亦突然喺記者會上暢所欲言，話冇放到暑假，至今已同超過四十個議員單對單討論創科局，自己一向作風低調，就算同議員傾都會低調傾，唔係喺公眾場合傾，佢希望幫議員了解多啲，又話大家都可以睇到部分議員態度有變喎。
佢又話自己嘅作風非政治化，最主要希望為香港經濟同社會帶來好處，而創科局係咪成立，就掌握喺議員手中。至於十月後拉布係咪冇拉得咁勁，就由議員決定，但佢認為拉布不合民主，變咗多數服從少數，但係依家制度上容許拉布，希望拉布嘅人諗清楚，為香港向前看，而唔係為拉布而拉布。
呢個訪京團冇邀請立法會資訊科技界議員莫乃光參加，副團長楊全盛話今次邀請咗五、六十個團體，近百二人，主要係創新及科技委員會成員、業界從業員同業界唔同會嘅「會頭」，冇特別邀請議員，未必所有人都能邀請。楊偉雄就話今次係被邀請，覺得呢個團想幫年輕人，反問點解因為政治問題就要唔去，佢唔會開出請埋第二個人先去嘅條件，否則就係唔公平。
但楊偉雄引述數字嗰陣就「甩轆」，佢提到依家香港面對人口老化，今日香港社會福利支出已超出教育，相信未來幾年醫療亦增加，希望透過高增值產業發展幫助年輕人。但其後被本報記者指出，本港福利開支仍低於教育開支，佢就補鑊話數字係滯後，政府睇人口老化唔係一朝一夕，老化就會令支出增加。
睇楊偉雄突然咁進取，不停講創科局，又參加訪京團，又咁努力爭取立法會議員支持，相反，應該係政府代表嘅商務及經濟發展局局長蘇錦樑就影都唔見，睇嚟業界對佢嘅認同都好有限，佢個局長位都危危乎嘞！
