乜嘢叫做「三個和尚冇水飲」，睇吓港產官僚做嘢就知。好似鉛水風波咁，港府煞有介事，動作多多，特首委任嘅獨立委員會、房委會以及水務署分別進行調查，兩個幾月眨吓眼就過去，到底「鉛頭」喺邊，港府仲係一頭霧水，簡直吹脹！

呢，早排有公屋承建商承認，之前一直以為焊料喺工程中佔比例小，唔會出事，所以疏於監管。房委會投標小組尋日開會，討論承建商嘅相關報告，建議今後由總承建商、房屋署及水務署就焊料作三重檢測。嗱，咪睇表面好似要重重把關咁吖，其實只係紙上談兵，純屬吹水，事關點樣落實建議，如何懲處涉事承建商，仲要等埋水務署轄下鉛水專責小組嘅調查報告。話就話今個月內有結果，但實際係點，根本無人知。至於特首委任嘅獨立委員會，更加連會都未開過，你話係咪得啖笑吖。

一方面港府查鉛水大歎慢板，另一方面受害者就愈來愈多，搞到人心惶惶。教育局早前幫全港學校驗水，結果首次發現有幼稚園食水中招，而且含鉛量仲超出世衞標準十倍，家長唔擔心就假。大家有眼見，鉛禍無遠弗屆，新樓、舊樓、公屋、豪宅、學校無一幸免，市民連飲啖水都要提心吊膽，諗落都幾悲哀。

講真，調查鉛禍真相話易唔易，話難唔難，睇吓官僚有冇心嘅啫。本報早前獨家踢爆水管焊接料含鉛勁超標，而且通街有得賣；連承建商都出嚟認頭，鉛兇源頭已經呼之欲出，當局調查工作居然老鼠拉龜，到底係咪關心市民健康，不問可知。家陣最大嘅問題係，即使找出元兇，當局可以點樣問責？有房委會委員話要嚴懲承辦商，而房委會亦的確有權禁止承建商競投新標甚至釘牌。不過唔好唔記得，好多公營房屋都係由四大承建商負責，禁止佢哋接新工程，勢必拖慢公屋落成進度。你知啦，輪候公屋大排長龍，唔少無殼蝸牛唔理好醜，但求就手，連凶宅都照殺，港府會唔會因此而投鼠忌器，真係冇人話得埋。

始終都係嗰句，揚湯止沸，不如釜底抽薪。港府一日唔從源頭堵塞漏洞，唔理驗幾多水，換幾多喉，都係治標不治本。政改落幕後，港府咪口口聲聲話會集中精力處理民生問題嘅，鉛水危機咪就係最大嘅民生問題囉，繼續唔嗲唔吊懶懶閒，分分鐘變成壓垮管治嘅最後一根稻草嘅咋，叮！