雖然話，本港基建工程延誤超支早就唔係新聞，冇延誤冇超支先係新聞，但聽到港府公布再有基建工程延誤，仲講到理直氣壯咁款，好似當公帑唔係錢咁，真係佛都有火，唔嬲就假。

係咁嘅，原定二○一七年通車嘅中環灣仔繞道及東區走廊連接路工程項目，由於填海期間發現疑似添馬艦殘骸而一度停工，加上喺新造土地上嘅挖掘工程有一定難度，土木工程拓展署要延至一七年中至可以將工地移交路政署進行後期工程，一延俱延下，繞道無可能如期通車。至於要延到幾時，路政署就三緘其口，一味話兩署正研究追回有關工程進度嘅可行性，睇吓有冇可能提前移交工地喎。

呢啲咪叫官字兩個口，噏得就噏囉。冇錯，海底發現船隻殘骸，事前冇人可以預計，但移走殘骸需時有限，有乜理由答唔出幾時至可以完工呢？咪畀人批中吖，移走船隻殘骸只係藉口咋，真正原因係各方面工程都嚴重滯後，所謂兩署正研究追回工程進度喎，擺明整色整水咋。仲有呀，延誤隨之而來就係超支，到底超支幾多，依家仲係未知之數。

聽吓專家點講吖，路政署嘅後期工程包括鋪設機電設施、測試消防設備等，都係手板眼見工夫，加上喺室內進行，唔會受天氣影響，料可於一年內完成，換言之，最遲一八年可以通車。講係咁講喇，弊在港產官僚做嘢甩漏，好多嘢真係話唔埋■，唯一可以肯定嘅係，原定喺中環灣仔繞道通車時推出嘅電子道路收費系統，受延誤影響而推出無期，你話係咪佗衰家吖？

冇計喇，香港近年好似撞邪咁，諸事不順，頭頭碰着黑，基建工程仲衰到推出一項延誤一項。淨係高鐵咋，原定一五年通車，家陣要推遲到一八年第三季，仲係望天打卦嗰隻，預算亦增加兩百多億元，隨時淪為無底洞。港珠澳大橋亦係咁，人哋珠海市政府拍心口保證明年底完工，港府就話要繼續評估工程進度喎，擺到明心虛喇。大橋隨時變成半橋，香港乜面子都丟晒喇。

講起就閉翳咯，以前香港出名速度快效率高，玫瑰園計劃咁龐大嘅項目，一樣話做就做，雷厲風行，點諗到家陣會淪落到咁嘅地步吖。如今嘅基建工程無一不延誤，無一不超支，無一不引起怨聲載道，再咁落去，就算有金山銀山，遲早都畀港府敗清光喇，叮！