別來無恙，梁芷珊復出球壇重掌飛馬，不只球衣由黃變紅，還多了足總董事的擔子。曾讓香港大球場紅旗高掛、名牌贊助蜂擁而至，重操故業，竟也考起才女：「以前可以試咗唔得，依家冇得唔得。」那動人時光不用常回看，戲言已是球圈「老海鮮」的Canny堅拒行舊路，創新思維再出發。搞波不分男或女，最重要還是「攞個心出嚟」。

「其實利馬與阿杜域係咪有閂埋房門練過one-two，點解個波可以從腳罅中溜過？睇波角度當然想球隊進取，但也要留放合時……」重溫飛馬3:3逼和冠忠南區的港超第一擊，梁芷珊（Canny）侃侃而談，口中雖說「唔識睇波」，卻早已不是9年前初入球壇的球盲才女，「我喺球圈算係『老海鮮』喇，更加需要新鮮人加入，啟發新思維」。

邀「新鮮人」出謀獻策

這次重掌飛馬，球員換上青春班，又邀得森美、伍家謙、盧覓雪等「新鮮人」加入足總市場推廣及傳訊委員會。全新朝氣，配合過去出謀獻策的彪炳往績，令人期待，卻也令Canny壓力爆煲：「我喺競選足總董事初期，未知要重掌飛馬，當兩邊一齊進行，便變得忙亂。依家飛馬已放手畀同事去搞，但仍然要諗好多，再去轉化成行動；足總則啱啱獲馬會贊助，marketing亦需出一分力務求達標，同9年前協助南華係兩個層次。以前係乜都試，可以試咗唔得，依家係冇得唔得，壓力同負擔都大咗很多。」

梁芷珊自言不愛呻，但還是於facebook寫下千字感觸，最耿耿於懷的，就是仍未為飛馬覓得球衣胸口贊助。以她的人脈，理應輕易而舉，她卻另有堅持：「好多人想出少少錢攞風頭，但我哋希望搵到有質素嘅贊助幫到球隊，又要有誠意證明，同做人世一樣，認定咗就唔會變。」曾為南華打造的動人時光，毋庸念念不忘：「喺我接管飛馬以嚟，從來冇諗過複製南華嘅架構同方程式，就算飛馬需要物色西裝，有人提議我點解唔搵番Armani，我都堅持say no。話晒搞南華已經係9年前，時代唔同，你叫我做番以前，我都接受唔到。」

感情行先≠感情用事

時代瞬息萬變，還需拿捏準確，走得太快或太遲，也會脫軌。《東網》首度直播港超聯，Canny讚不絕口：「場波完咗冇耐，有朋友同我講可以立即用app睇番，好正！想起5、6年前，唱片公司都曾經搵到網上媒體直播event，但換嚟冷嘲熱諷。我唔會自誇『一早諗到』，因為timing好重要，走得太前冇意思。」她戲言也許已達「中女」階段，正好取得中間點平衡，「原來每放低一格框框，就會睇多啲啲，心態舒服咗，亦可以話比以前癲咗，女人唔同年齡有唔同癲法」。那麼女人搞波，有何不同？「最唔同可能係感情行先，但唔代表我感情用事。我唔會因為friend就乜都得，好似李威廉，佢仲有能力踢大球會，但飛馬要貫徹青春活力宗旨，就只好建議佢轉任助教。仲有文彼得，如果畀佢減薪繼續踢，更加唔係幫緊佢。真正幫球員，係為佢搵到最合適嘅路。」

球員轉型「新手」上路，難免會撞板，Canny偏向多鼓勵、少責罵。女性的溫柔，令她與球員建立另類信任，即使是遠在塞爾維亞的基士文，還是分道揚鑣的陳志康、楊正光等，依然友好如昔；與球圈中人間，更如同親善大使。她笑稱：「或者係我識得點同男人溝通！佢哋有cool、有怕醜、有識做，但人同人相處，最重要都係攞個心出嚟。」足總工作亦然？「唔知work唔work，但我偏愛向高難度挑戰。」只要有心，不分男與女，搞波一樣得！