政府靠得住，豬乸會上樹，絕對冇講錯。港產官僚大事做唔到，小事做唔好，唔係幫市民解決問題，而係添煩添亂，簡直係鑊鑊新鮮鑊鑊甘。
話說部分租者置其屋計劃下嘅樓宇日久失修，長期受滲水問題困擾，不勝其煩。正所謂，年紀大，機器壞，部分租者置其屋單位已有三十幾年樓齡，滲水一啲都唔出奇，奇就奇在有居民先後搵房屋署同滲水辦做測試，結果居然有兩套標準，都唔知信邊個好。
嗱，馬鞍山恒安邨有個單位兩年前發現廁所、客廳天花同牆身滲水，租戶自己執過都未見改善，月前搵房屋署檢查，發現濕度達百分之二十八，但搵滲水辦測試，濕度就只有百分之十一到十八。根據滲水辦嘅標準，濕度要超過百分之三十五至會展開調查，即係話呢個單位仲未達標，滲水辦關人個關，住戶只好繼續忍受滲水困擾，你話幾無奈吖。
「一國兩制」就話正常啫，「一府兩制」你聽過未吖？同樣係政府部門，房屋署同滲水辦各自為政，各有標準，搞到市民莫名其妙。其實，呢個單位唔止滲水咁簡單，已經嚴重到有石屎剝落危機，兩個部門幫唔到住戶不特止，連調查都慳番，簡直不負責任。而更令住戶困擾嘅係，租者置其屋計劃特殊，維修問題權責難分，業主及租戶都無所適從。
有立法會議員睇唔過眼，計劃喺議會提出質詢，要求當局釐清權責，盡快跟進受影響住戶個案。查實恒安邨早已係樓宇滲水重災區，如果政府部門有心解決問題，住戶又何至於求助無門吖。前排之嘛，本報曾踢爆呢個屋邨滲水問題嚴重，近期相關投訴就超過六十宗。呢類高齡屋邨本來每隔五、六年就應該進行大型防滲工程，但恒安邨居然十七年都未做過相關工程，擺明係政府部門失職喇。
所以話，房署根本就係用租置屋邨業權特殊做偷懶藉口，推卸責任。而滲水辦同樣離譜，測試標準落後，備受詬病，但就依然故我，不思改進。呢，佐敦一幢舊樓住戶，○五年發現問題向當局求助，一拖九年都確定唔到源頭，你話係咪靠害吖。
話時話，滲水辦成立咁多年，講就天下無敵，做就無心無力，做嘢馬虎，標準過時，滲水源頭搵唔到幾個，甩漏就數不勝數，簡直係成事不足，敗事有餘。呢啲衙門盞嘥公帑，不如摺咗算喇，叮！
第一手消息請下載on.cc東網
