政治凌駕民生 扶貧雷大雨小
家陣嘅香港，政治凌駕一切，經濟及民生一律睇唔到、聽唔見。好似扶貧咁，莫講話港府嘅扶貧措施有姿勢無實際，就算想做實事亦有心無力。梗係啦，佔領行動搞到政府停擺，不合作運動又令議會癱瘓，基層市民首當其衝，成為最大嘅受害者。
嗱，尋日立法會扶貧小組委員會舉行公聽會，多個關注團體大吐苦水，指扶貧委員會任期十一月屆滿，但至今雷大雨小，未有任何成果，佢哋要求政府檢討貧窮線，訂立扶貧目標及盡快推行低收入在職家庭津貼。反對派議員亦加把口，大罵政府唔肯調動議程，提前審議扶貧措施喎。
所以話，來說是非者，便是是非人。反對派大搞不合作運動，政府動輒得咎，寸步難行，梗係一事無成啦。好似低收入在職家庭津貼咁吖，本來可以令七十萬基層市民受惠，偏偏反對派係都要玩嘢，唔係拉布，就係流會，搞到撥款申請遲遲未能通過，連勞福局局長張建宗都忍唔住開聲，要求議員手下留情，唔好再拖累基層市民。你話嘞，反對派仲好意思惡人先告狀，係咪強詞奪理，不知所謂吖？
咁仲唔止，原訂九月底舉行嘅扶貧高峰會，亦受到佔領行動影響一再延期，都唔知幾時至可以舉行。更大鑊嘅係，全民退休保障計劃研究報告八月出爐後，亦因為佔領行動爆發而失焦，負責撰寫報告嘅學者慨嘆，政府又好，市民又好，已經無人關心。喂，全民退保同全港打工仔息息相關，講足二十年，家陣先至稍有眉目，點知因為政治問題而被棄如敝屣，有冇再離譜啲呀！
當然喇，港府扶貧得個樣，都係唔抵幫嘅喇。當局兩年前訂立首條貧窮線，聲稱會推出針對性扶貧措施，依家兩年過去喇，無非推出長者生活津貼及聊勝於無嘅關愛基金援助項目，簡直係杯水車薪。大家有眼見，本港貧窮問題千頭萬緒，點止老年貧窮咁簡單，兒童貧窮、在職貧窮、Ｎ無人士等等，通通亟需援手，政府幾時先肯對症下藥吖。
話時話，家陣全民陷入政治狂熱，社會烏煙瘴氣，香港點可能有運行吖。佔中搞手拍拍屁股退下火線，復教搵食去也，難為全港七百萬人被佢哋綁上戰車，經濟民生通通淪為犧牲品。無論點都好，香港有好多正經嘢急需解決，大家係時候收拾心情，唔好再陷於政治泥沼，嘈喧巴閉喇，叮！
