政壇：Greg蘇搶閘搵人一齊捱
創新及科技局上周終獲立法會通過，但係新局嘅開支仍要等財委會審議，一日錢未到，新局幾時成立、幾時運作都係要等。不過，呢個新局當中，有唔少係現有嘅部門撥入去，佢哋用原有嘅資源未必會受影響，政府尋日就公告招聘資訊科技總監，以首長級第六級，月薪高近二十一萬元招聘新人，睇嚟，商務及經濟發展局局長蘇錦樑（Greg蘇）已經急不可待，想嗱嗱聲搵人返嚟一齊捱熱廚房。
設計圖片及對白
現任總監賴錫璋嘅三年任期將於明年一月屆滿，佢二○一二年接手時，已經係以六十四歲之齡上陣，今次唔再續約都係意料之內。何況，創科局成立後，政府資訊科技總監辦公室將會撥入創科局，呢個新局打正旗號要發展香港嘅高新科技業，工作瓣數同要求可能都要調整。睇番資料，賴錫璋三年前受聘時，薪金大約為每月十八萬元，依家新官每月比當時多咗三萬元，係咪反映新局嘅新要求，同市面同類人才嘅價格，真係要政府解畫嘞。
代行局長職責惹質疑
依家招聘工作已經拉開序幕，政圈有人質疑，既然將來有個創科局局長，點解唔等到新局長上任，才開始招聘佢嘅下屬呢？如果新局官員由Greg蘇呢個主管商務嘅問責官揀蟀，係咪奇怪咗啲呢？話雖如此，招聘工作唔係一時三刻搞得掂，依家開始公開招聘，從截止申請到面試，然後係遴選，仲有好長一條路要行，或者，到最後揀蟀階段，新局長已經上任，咁咪唔使假手於人囉。
不過，創科局開局工作仲有唔少手尾，淨係撥款申請，估計Greg蘇都要去多幾次立法會受靶，開新局，真係唔易o架。
