垃圾推畀內地收 損人利己大諗頭

嗱，本港固體廢物愈來愈多，點樣處理已經成為政治問題，堆填區即將陸續爆滿，而「三堆一爐」方案又受阻於立法會，過關遙遙無期，垃圾圍城遲早噩夢成真。有人異想天開，要求內地出手相助，希望中央同珠海方面協調，撥出孤島畀香港興建「垃圾島」同「環保教育科研中心」喎；佢哋仲話，珠海一帶有好多合適嘅島嶼，咁做唔止可令堆填區遠離港人，仲可以推動香港同珠三角環保產業添。

喂，家陣講緊香港嘅垃圾問題，又關內地事？自己嫌三堆一爐污染環境，就想將垃圾推畀內地，而且美其名推動環保產業，仲有冇自私啲吖。再講喇，香港亦有唔少孤島，點解唔可以興建垃圾島，反而捨近求遠去珠海呢？己所不欲，硬施於人，點講都唔通喇。

唔怪得喺部分內地同胞眼中，香港直情係被寵壞嘅細路，要呢樣要嗰樣，好似老奉咁，永遠唔識得反省。冇錯，中央對香港一向有求必應，好少托手（月爭），可惜好心冇好報，部分港人唔領情不特止，仲下下同中央對着幹，有人甚至當內地同胞係蝗蟲添。家陣香港自己搞唔掂垃圾，有人居然打起內地主意，簡直係一廂情願。老實講吖，今時唔同往日，香港人識得講環保，內地同胞都識嘅啫，就算中央願意出面協調，珠海當局肯撥出孤島，當地居民都唔肯喇。

正所謂，自作孽，不可活，垃圾圍城危機迫在眉睫，根本係香港自己嘅問題，又點可以推畀人哋o架。之所以搞成咁，港府無能固然難辭其咎，而立法會全面不合作亦要負好大責任，反對派政客為達到不可告人嘅政治目的，無所不用其極，一時拉布，一時流會，一時爆粗，一時擲嘢，搞到議事堂烏煙瘴氣。施政癱瘓，立會空轉，三堆一爐方案遲遲過唔到關，香港想唔變成臭港都幾難。所以話，冤有頭，債有主，政客阻住地球轉，市民應該向佢哋追究責任，而唔係強人所難企圖將垃圾推畀內地，人哋冇義務幫你o架。

講到底，香港問題香港解決，香港垃圾香港處理，天經地義。咪話太一叮唔提醒吖，三堆一爐一拖再拖，造價必定一升再升，到頭來又係納稅人埋單，除非大家真係想見到香港淪為垃圾港喇，叮！