防疫唔湯唔水 官僚是是但但
伊波拉來勢洶洶，全球中招人數超過九千，美國及歐洲相繼失守，一直懵盛盛嘅港產官僚終於知驚，日前舉行跨部門會議應對疫情。遲到好過冇到，當局肯正視問題梗係好啦，可惜吖，所謂嘅防疫措施到喉唔到肺，隨時走漏眼嘅咋。
嗱，最新嘅抗疫措施係咁嘅，首先即時收緊發燒定義，由攝氏三十八度降至三十七點五度，發燒病人若到過受影響地區，醫生須立即呈報；第二係邀請二十一日內到過疫區嘅旅客自願填寫健康監察問卷；第三係加強培訓醫護人員穿卸保護衣物程序。食衞局局長高永文話喎，已加強跨部門應變演習，一旦本港出現疑似或確診伊波拉個案，一律送去瑪嘉烈傳染病中心隔離。
表面睇，防疫措施面面俱到，無懈可擊，不過睇真啲，其實問題多多。先講收緊發燒定義吖，咁做唔係唔好，但如果醫護人員因為病人發燒度數未達標而放鬆警覺，隨時走漏眼。再講吖，旅客健康監察問卷並非強制填寫，正如傳染病專科醫生話齋，咁做唔湯唔水，完全失去追蹤旅客及病源嘅意義。最令人莫名其妙嘅係，當局口口聲聲話呢類旅客每日只有十五個咁大把，既然係咁，點解唔強制旅客填寫問卷呢？傳播疫情唔使多，一個漏網之魚就大劑喇。
防疫寧緊勿鬆，口岸作為抗疫第一道防線，把關應該沒有最嚴，只有更嚴，可惜事實剛好相反。呢，本報記者早前巡視機場及離境口岸，發現職員對非洲旅客視若無睹，不單止冇主動探熱，甚至連防疫宣傳單張都唔派，是是但但，關人個關。當局仲大安旨意話唔使增加檢疫人手喎，同唱空城計冇分別嘅咋。
作為第二道抗疫防線嘅公立醫院亦唔好得去邊，一樣亂七八糟，好似有啲急症室如同無掩雞籠，醫護人員連口罩都唔戴，病房藏污納垢，問你服未。唔係靠嚇，美國兩名曾經照顧伊波拉患者嘅護士先後中招，佢哋都係全套保護衣物上陣，證明保護衣物並非萬無一失。美國咁先進都搞到一鑊泡，本港公立醫院求其成咁，呢場防疫戰仲邊有勝算吖。
講開又講，美國總統奧巴馬為咗更有效防疫，最近委任伊波拉抗疫專員統籌全國防疫工作，值得港產官僚好好借鏡。講到尾，抗疫唔係玩泥沙，保護措施冇人會嫌多，萬一因為做少咗而被病毒乘虛而入，咁就大鑊喇，叮！
