競爭力又輸獅城 搞對抗自毀長城
香港同新加坡一直被譽為現代雙城記，為爭一日之長短，法寶盡出。可惜吖，香港近年一味沉迷政治，內耗內鬥，不斷沉淪，反觀新加坡疊埋心水搞經濟，結果風生水起，愈撈愈掂。此消彼長，兩地差距咪愈拉愈闊咯。
嗱，世界銀行尋日發表《二○一五年營商環境報告》，根據開辦企業、註冊財產、獲得信貸等十項營商條件指標，為一百八十多個經濟體進行排名，結果新加坡一枝獨秀，連續九年排名第一。香港排名拾級而下，比去年又跌一位，只得第三，當中註冊財產方面下跌至九十六位，獲得信貸方面亦較去年下跌四位，被新加坡大幅拋離，問你死未。
雖然世銀解釋，香港之所以繼續下跌，係因為今年改咗評分方法，其實呢啲都係客套說話啫。事關點計都好，香港落後新加坡都係不爭嘅事實。逆水行舟，不進則退，正如世銀所講，香港喺過去一年冇改善註冊財產程序，產權轉移長達三十五點五日，費時失事，而轉讓成本更高達物業價值約百分之八，加上港府調高商業登記費，皮費大大增加，外資識得揀，梗係揀新加坡啦。
難得港府仲沾沾自喜，認為有關報告充分肯定佢哋對方便營商所作嘅努力喎，簡直唔知醜字點寫。喂，係人都知，香港競爭力每況愈下，國際報告又好，國內調查都好，不約而同指出香港只係靠食老本，好快無以為繼。其實唔好話經濟表現一蟹不如一蟹喇，環保指標、大學排名等，香港亦被新加坡愈拋愈遠。所以話，港府繼續安於現狀，不思進取，香港遲早玩完嘅咋。
最弊嘅係，佔領行動死唔斷氣，全民陷入政治狂熱，經濟民生無人關心。老實講，內地發展一日千里，香港嘅重要性已大不如前，同內地搞對抗即係同自己過唔去。仲有呀，香港最大優勢係健全嘅法治制度，偏偏佔領班人不知自愛，破壞法治，自毀長城。再咁落去，莫講話香港拍馬都追唔上新加坡，直情連中國二線城市地位都保唔住吖。
話時話，世銀份報告仲未反映佔領行動對香港嘅影響，明年仲保唔保得住第三位，真係唔樂觀。正如金管局前總裁任志剛話齋，香港一味為內地添煩添亂，到時內地另起爐灶，減少對港政策傾斜，後悔已經太遲。嗱，內地叫停旅行團及滬港通已經係警號，香港遲早玩死自己嘅咋，叮！
