紅皮白心搞破壞 清除內奸待何時

嗱，正當港府同學生組織落實對話之際，示威人士突然發難，旺角重新淪陷，形勢再次膠着。有人質疑當局喺對話之前清理部分佔領區，添煩添亂，反映內部存在意見分歧。咁又係吖，自從佔中爆發以來，當局好多做法不合常理，耐人尋味。日前有海外媒體報道，中央已查獲港府中有幾名司局級官員係「紅皮白心」，表面上擁護中央，私底下同佔中分子勾結，當局已有充分證據，適當時候就會揭露咁話。空穴來風，未必無因，睇番回歸以來尤其係佔中亂局，就知道相關報道唔係危言聳聽。

最匪夷所思嘅係，有位女高級警司日前居然戴住回歸前皇冠警徽嘅警帽見記者，被識穿之後，佢解釋話「睇漏眼」，扣錯警徽喎。喂，皇冠警徽已經停用超過十七年，話就話警務人員可以留為紀念啫，但點都冇理由戴住佢招搖過市o架，如果咁都可以「睇漏眼」，金紫荊廣場升旗禮容乜易扯支米字旗上去吖？所以話，睇漏眼係假，有人對舊主人念念不忘至係真。咁又難怪嘅，連司局級高官都係紅皮白心，女高級警司頭戴皇冠警徽又有乜出奇吖。

同樣荒謬嘅係，七名警務人員被指「濫用暴力」對付佔中人士，需要停職接受調查，但負責跟進嘅監警會不乏佔中支持者，部分委員早就有政治立場，最後會查出乜嘢結果，畫公仔唔使畫出腸喇啩。

正所謂，堡壘最容易從內部攻破，如果港府唔係充斥紅皮白心嘅無間道，香港又點會七國咁亂吖。好似前政務司司長陳四萬咁吖，動不動就飛去英國求援，要求洋主人替佢出頭；而前特首煲呔曾更加對英女王忠心耿耿，始終唔肯放棄爵士銜頭。佢哋飲英國人奶水長大，對洋主人念念不忘一啲都唔出奇，奇就奇在回歸十七年後嘅今日，港府裏面依然充斥餘孽，真係唔到你唔服。

事實證明，回歸咁耐亂足咁耐，就係因為治權未回歸。前朝餘孽呼風喚雨，興波作浪，同反對派甚至外部勢力眉來眼去，裏應外合，搞到佔中亂局一發不可收拾。計太一叮話齋，既然中央已掌握「紅皮白心」嘅證據，咁就要盡快清除內奸，撥亂反正喇，叮！