社會撕裂爭拗多 港式文革手尾長

嗱，冤有頭，債有主，尋日就有兩位受影響商戶分別入稟，向佔中發起人之一戴耀廷索償。佔領行動搞咗咁耐，深受其害嘅市民數不勝數，索償將陸續有來，呢班搞事者今鋪有排煩咯。話時話，經濟損失點都有數可計，但社會撕裂嘅後遺症，對於香港嘅破壞就無法估計，邊個賠得番吖。

大家有眼見，因為政見唔同，家陣支持同反對佔中嘅兩派分歧愈來愈大，反目成仇嘅個案層出不窮。有支持佔領行動嘅寵物店店主揚言，以後唔會為警務人員提供服務喎。唔係啩？對警察不滿又關貓貓狗狗事？豈不是變成有民主冇「狗主」？就算內地文革都冇咁誇張，最多「黑五類」冇飯開，都未至於禍及小動物喇。亦有牙醫話明拒絕為警員同家屬提供服務，喂，救死扶傷係醫生天職，以政見異同取捨病人，點做得醫生吖。

社會高度對立之下，真係乜騎呢嘢都會發生。家陣個個只問立場，不問是非，一言不合即時反枱，連朋友都冇得做。呢，有新人要拉埋天窗，因為「黃藍」之爭，喜事變煩事。本來諗住婚宴嗰陣舊同學一圍，點知有人撐佔中，有人反佔中，舊同窗冇辦法坐埋一張枱，搞到一對新人晒頭。

仲有吖，一家人平平安安食餐飯亦唔容易o架，有主婦擔心個仔去現場會出事，苦口相勸，卒之嗌大交，個仔出走旺角，電話都唔接，估計有同樣遭遇嘅家庭一定唔會少。唔講唔知，網絡群組反應更激，出現咗一股unfriend潮同埋退群組潮，總之非我族類，即時割席，咁都唔止，網上興起起底潮，將人哋私隱都爆晒出嚟，簡直離譜到冇朋友！

唉，香港已經搞到雞毛鴨血，路路不通，生意急跌，返工返學遲大到，甚至連家庭生活都受影響，咁嘅環境下，唔反常至奇喇。呢嗱，紅十字會開設嘅心理支援服務熱線，已經收到三百幾個求助電話，大部分都係因為事件導致失眠同感到悲傷。

一句講晒，佔中禍港，後患無窮，點止經濟受損咁簡單。計太一叮話齋，佔中爭取唔到「真普選」，港人唯一嘅「收穫」就係，親身體驗咗港產文革滋味，叮！