阿根廷、巴西訪京被玩殘！周六晚喺鳥巢踢熱身賽嘅南美雙雄，尋日分別遇上連環不愉快事件，一眾球星由興致勃勃變成冇癮收場。阿根廷昨晨拉隊去故宮遊覽，點知塞咗一大輪車去到先被拒落車，留喺酒店嘅巴西亦黑仔遇上停電，壓軸抵北京嘅卡卡喺機場更被瘋狂粉絲打中塊俊臉添！

迪馬利亞

卡卡

鬥完巴西就會嚟香港嘅阿根廷，前晚練波氣氛唔錯，美斯更加全程笑住咁操添。抵埗後一直保持低調嘅美斯，尋日同阿古路留喺酒店休息，迪馬利亞、馬斯真蘭奴等就一早「領軍」遊故宮，但由於呢次行程屬臨時加插，保安工作未有預先協調，一眾球星最終被拒絕落車參觀。

美斯留守酒店 歎北京填鴨

無端端用咗半日喺大霧中「遊車河」，迪馬利亞一度拍車窗以示失望，阿根廷球員連秀水街都冇去就打道回府。同白行一場嘅隊友相比，美斯同阿古路就認真識歎，留喺酒店做Gym後一齊去食店內有名嘅北京填鴨，又有美女球迷向佢哋攞簽名，叉完電落到球場都特別醒神啦。

另邊廂巴西亦唔好得幾多，卡卡昨晨壓軸飛抵北京獲大批球迷迎接，由於粉絲人數眾多，混亂中卡卡被一名攞簽名嘅球迷打中面部，好在呢位靚仔球星並冇發嬲，反而繼續同球迷簽名合照。已87次代表巴西上陣嘅卡卡被問到會否以100場為目標，佢話：「我冇諗過100場嘅問題，只希望繼續代表國家隊出賽。」

森巴大營停電 去練波摸門釘

巴西下榻嘅酒店尋日中午亦突然停電，據聞酒店方面係為下月亞太經濟合作組織進行電力調整，一眾國腳焗住要提前去練波，點知去到球場門口竟然冇人開門，尼馬等球星被迫喺車上等候。巴西今次練習力度明顯加強，啱啱歸隊嘅卡卡即刻投入分隊賽賽事，睇嚟黑仔事件冇影響球員戰意喎！