寄生樹搖搖欲墜 屋宇署卸得就卸

嗱，近年本港頻頻出現冧樹傷人甚至殺人慘劇，令人防不勝防，點解會咁？咪就係因為港產官僚永遠唔識吸取教訓，亡羊不補牢囉。唔講唔知，除咗病樹暗藏危機，仲有一樣殺人武器叫寄生樹，依附唐樓外牆，亂象叢生，搖搖欲墜，睇見都牙煙。呢類寄生樹唔係生喺偏僻郊野，而係人煙稠密嘅舊區，一旦出事，唔止冧樹，隨時連牆都冧埋，後果不堪設想。

唔係講笑o架，大家只要去土瓜灣、深水埗、油麻地等舊區兜個圈，就會發現寄生樹無處不在，唔少唐樓外牆紛紛淪陷，有啲寄生樹生到兩三米高都冇人理，表面上枝葉繁茂，實際上根基不穩，根部只係抓住細小水管或牆身裂縫，可以講係弱不禁風。更得人驚嘅係，呢啲唐樓本身已經殘殘舊舊，甩皮甩骨，石屎剝落，鋼筋外露，如果樹根「撬」起，危牆倒冧，分分鐘爆大鑊都似。

正如工程師話齋，呢啲寄生樹如果被強風吹倒，力度足夠將一兩平方米嘅牆身扯脫，都咪話唔得人驚。有立法會議員就批評當局冇主動處理問題，一味玩拖字訣，經常以「私人地方」為藉口，拖得就拖。亦有環保團體負責人指現時根本冇部門監管寄生樹，當局可能「等出事先有人理」。

當局又點樣回應呢？屋宇署話喎，接到呢類舉報時，會派人去現場視察，如果發現樓宇結構受影響，就會聯絡業主，並依法跟進。唉，又係十足十嘅官腔，講咗等於冇講。所以話，港產官僚永遠都係四方木，踢一踢至郁一郁。係人都知，寄生樹依附外牆，隱患重重，險象環生，當局唔主動清除隱患，一味將責任推畀市民，擺明卸責啫。試問係咪要等到再發生冧樹冧樓慘劇，你哋至肯做嘢吖？

正所謂，人命關天。無論係私地官地，無論係新樓舊樓，無論係病樹寄生樹，凡係有危機，都應該及時清除，點可以咁求其咁兒戲o架。咪話太一叮唔提醒，食得納稅人俸祿就要做嘢，推卸責任只會令問題繼續惡化，如果大吉利是搞出人命，呢隻鑊你哋孭唔孭得起吖？尤其係依家香港時運低，佔領行動搞到七國咁亂，成個社會冇晒秩序，好易招惹災禍嘅咋，叮！