「聖卡斯」又孭鑊佗衰家！西班牙隊長卡斯拿斯仲未走出世盃陰霾，昨晨喺歐國盃外圍賽又再判斷錯誤失波敗家，累「狂牛兵團」作客1:2輸畀斯洛伐克，近8年嚟首度喺外圍賽輸波，「狂牛1號門神」之位隨時要讓畀迪基亞。同人唔同命，英格蘭同晚5蛋大炒聖馬力諾，「喼頓」朗尼就算搏晒老命兼有士哥球迷都「唔收貨」，反而做足成場「觀眾」嘅門將赫特就獲選最佳球員，真係頂癮！

卡斯拿斯

赫特（綠衫）零撲救擁躉都Like，其他「三獅兵」表現明顯未能令人滿意。（美聯社圖片）

斯洛伐克勇挫西班牙，爆出大冷門。（美聯社圖片）

英格蘭（白衫）大炒聖馬力諾總算冇失威。（Getty Images圖片）

喺世盃連環孭鑊嘅卡斯拿斯，昨晨率領西班牙喺歐國盃C組造訪斯洛伐克又再出醜，主隊中場古卡喺開賽17分鐘施展遠程炮罰球，本應角度欠奉，殊不知「聖卡斯」竟然移錯位目送個波入網，累西班牙先失守，最終「狂牛兵團」更慘輸1:2敗走斯洛伐克，外圍賽作客14連勝強勢宣告斷纜。

迪基亞上位在望

雖然入籍西班牙後，踢咗6場都仲未開齋嘅前鋒迪亞高哥斯達都係箭靶之一，但頻頻孭鑊嘅卡斯拿斯就畀人抦得最甘，西班牙《體育報》同《米蘭體育報》都將茅頭指向佢，英國《衞報》直情話迪基亞即將搶走「聖卡斯」嘅1號門神席位，既然「狂牛兵」人才輩出，呢位皇馬門神不如學沙維、沙比阿朗素咁急流勇退，好過賴死唔走喺度獻世啦！

朗尼13次起腳入1球

另邊廂E組嘅英格蘭昨晨喺主場以5:0大炒聖馬力諾，隊長朗尼雖然射入12碼，攞到佢喺國家隊第42個「士哥」，並成為「三獅兵團」史上首位喺正式比賽（唔計熱身賽）攻入30球嘅球員，可惜佢對住聖馬力諾起腳13次都係入得1粒，要追平英格蘭史上3號射手格里夫斯嘅44球紀錄又要等等。

朗尼落力演出未獲認同，唔單止喺今仗官方MVP選舉輸畀韋舒亞，就連網民都唔畀Like佢，喺vauxhallfootball.co.uk搞嘅最佳球員選舉中，成場冇嘢做、連1次撲救都冇嘅赫特竟然獲得63%選票當選最佳球員，網民咁撐赫特，似乎好唔滿意其他「三獅兵」嘅表現喎！