地政消防靠害 村民走投無路
「唔該畀條路行吓喇」，唔好誤會，講緊嘅唔係阻住地球轉嘅「佔領區」，而係西貢蠔涌新村嘅五百戶村民，由於村內唯一出入口通道上個月畀人用水泥石屎封死咗，搞到私家車以至吸糞車不得其門而入，村民坐困愁城，大嘆行不得也哥哥，真係有苦自己知。
件事係咁嘅。蠔涌新村近半居民以車代步，靠晒呢條通道，一直相安無事，點知地政總署上個月唔知食錯咩藥，無喇喇將通道劃為私人用地，於是咪出現上述封路嘅荒謬場景囉。咪以為講玩呀，私家車被迫改泊村外停車場，出入唔方便兼夾要交雙重費用都係其次，最大鑊係村屋冇排糞管道，要靠吸糞車定期吸走污物，家陣連吸糞車都被「封殺」，已經有三戶人家嘅化糞池塞爆，再拖落去後果不堪設想。仲有吖，萬一發生火警，消防車因為入唔到去搶救而隨時搞出人命，呢隻鑊港產官僚孭唔起o架。
居民出入受阻，無廁可用，仲分分鐘有生命危險，唔嬲就假咯。幾十位村代表日前踩上地政總署同消防處總部，抗議地政總署亂批地起丁屋，令緊急通道「私有化」，對消防處冇嚴厲執法表達不滿。
即係咁，地政總署職責係批地建屋，唔係封路圍村，家陣居然容許緊急道路地段「私有化」，簡直靠害。至於消防處，明知有安全隱患，更加唔可以闊佬懶理，關人個關o架。可惜吖，港產官僚扯皮成性，消防處大腳將個波傳畀地政署，話冇收到對方確定相關路段係唔係緊急車輛通道，所以未有採取跟進行動。消防地政，一個亂點鴛鴦，一個敷衍卸責，居民狠批兩部門失德無能，真係一啲都冇鬧錯o架！
話時話，呢兩個衙門做嘢甩漏多多，烏龍百出，三日三夜都數唔晒。特別係消防處，更加出咗名有法不依，執法求其。今時今日香港消防隱患無處不在，就講新界村屋吖，本報曾經踢爆唔少人走法律罅，先按規定安裝消防設備，攞到「滿意紙」後即刻拆走，處方一直視而不見，甚至報道出街後繼續扮盲，既唔巡查，亦唔執法，一直「零檢控」，最後搞到申訴專員公署主動出擊調查。所以話啫，今次「封路」事件，只係消防安全問題嘅冰山一角咋。
都係嗰句︰民生無小事。家陣佔中風頭火勢，官僚繼續吊吊揈懶懶閒，直頭為亂局火上加油嘅咋，叮！
