佔中摧殘經濟 法治一鋪清袋
佔領行動愈來愈激，龍蛇混雜嘅旺角佔領區更加係惡鬥連場，乜鬼「愛與和平」吖，「恨與暴力」就真，雖然話政府同學生組織即將展開對話，但幕後黑手唔想收手，睇怕都係嘥氣。即係咁，呢場鬧劇點樣收科就唔知，但係香港咁樣搞一搞，除咗經濟嚴重受挫，法治精神仲隨時一鋪清袋添。
呢，財爺鬍鬚曾尋日發表網誌，話政府依家正收集數據，評估運動對經濟嘅具體影響，初步顯示佔領地區嘅零售、飲食業首當其衝，整體信用卡消費大幅下跌。佢又警告，香港法治同穩定嘅國際形象受損，長遠會嚇走投資者喎。
梗係啦，佔中曠日持久，市面水盡鵝飛，唔使等鬍鬚曾收集數據，業界早就嗌晒救命，有老闆開始放員工無薪假，結業裁員潮一觸即發。至於旅遊同零售業，更加多得班示威者唔少，「十一」黃金周無啖好食唔在講，聖誕新年遊報團高峰期臨近，唔少旅行社反映生意慘淡。連國際著名品牌都叫苦不迭，話佔領封路令奢侈品銷售跌咗一半咁多。
公道啲講，雖然鬍鬚曾廢話居多，但有一點冇講錯，佔領拖得愈耐，對本港國際形象同競爭力損害愈大。係人都知，香港租金貴，成本高，點解對投資者仲有吸引力？無非法治同穩定啫。家陣香港變得七國咁亂，示威者鍾意封邊度就封邊度，鍾意封幾耐就封幾耐，為所欲為，無法無天，仲邊有法治同穩定可言吖。法治易毀難建，法治之都嘅金漆招牌一旦打爛，要重新建立投資者信心，你估咁易咩。
老實講，佔中綁架香港經濟民生，冇可能迫使中央政府讓步，反而分分鐘激到中央收緊對港政策添。訪港旅行團已經叫停，個人遊政策隨時調整，而原訂今個月尾啟動嘅滬港通亦可能因佔中而推遲。講到底，香港只係中國一個城市，點可以鬧兩鬧就由得你想點就點o架。如果用父子比喻中港關係，個仔一哭二鬧扭計買玩具，做老竇嘅如果次次屈服，其他仔女有樣學樣，仲點管教呀。再講吖，今時今日內地發展一日千里，香港喺全國嘅重要性早就今非昔比，仲憑乜嘢同中央爭吖，佔中影響唔到內地，反而香港內耗內鬥，自己已經玩死自己啦。
正所謂胳膊拗唔過大髀，佔中黑手搞死香港，可以拍拍籮柚走人，即使將來上法庭都有洋奴餘孽照住，基層市民咯喎，食自己就有份，叮！
