佔中靠害打工仔 薪酬加幅勢縮水

呢，有團體調查發現，大部分受訪機構預測下年度加薪幅度為百分之四到百分之四點五，其中基層員工加幅最少。負責調查嘅學者估計，佔中對好多行業都有影響，政局動盪令市民消費意欲同模式改變，預計明年實際薪酬加幅將會比依家嘅預測下調一個百分點。咪睇小一個百分點吖，等於加薪幅度少四分之一，扣除通脹等因素，明年打工仔嘅收入隨時少過今年o架。基層打工仔本來就捉襟見肘，家陣畀佔領行動搞一搞，更加係雪上加霜，想唔勒緊肚皮都唔得。

正所謂，一損俱損，佔領行動又點止靠害打工仔吖，各行各業都蒙受巨大損失，唔少行業損失慘重，叫苦連天。尤其係零售業，更加係慘淡經營，有店舖焗住縮減皮費，要求員工放無薪假。淨係佔中首星期咋，連同金融市場嘅波動，經濟損失估計達數以百億元計，家陣佔領咗近一個月，經濟損失更加係天文數字。

除咗經濟損失，難以量化嘅社會同民生代價更加無法計算。成個社會已經被嚴重撕裂，無法無天，只問立場，不問是非，政客沉迷政治爭拗，懶理經濟民生，搞到立法會又拉布又流會，烏煙瘴氣，乜都做唔成。嗱，大量民生議題排住隊等立法會審議，例如三堆一爐、低收入在職家庭津貼及公務員加薪等撥款申請，唔知幾時至可以通過。政客不務正業，醜態百出，你話係咪阻住個地球轉吖。

講開又講，明年嘅施政報告及財政預算案日前已經展開諮詢，呢兩樣嘢唔止關乎市民切身利益，而且關乎香港未來發展，本來應該引起社會關注，可惜家陣陷入政治狂熱，七國咁亂，根本冇人關心施政報告及預算案。香港向來以法治自詡，港人一向和平理性，今日竟然淪落到咁嘅地步，諗落真係可悲。

無論點都好，悠悠萬事，民生為大，政治唔可以當飯食，爭取民主的確好高尚，口號的確好動聽，但點都要顧及民生o架。事實證明，佔中搞手及幕後黑手勾結外部勢力，根本就係想搞死香港，如果市民繼續陪佢哋癲，遲早齊齊淪為政治犧牲品嘅咋，叮！