鐵腕主帥歸位！出名嚴厲嘅巴西主帥鄧加，尋晚公布咗最新一輪嘅23人大軍名單，不過揀咩人反而唔係大家嘅焦點。呢位教頭頒布咗水蛇春咁長嘅軍規，除咗要求國腳唔准戴帽、耳環同着拖鞋之外，仲推翻上任教練史高拉利嘅「開放政策」，重施禁慾令，實行要鐵腕治軍帶領「森巴兵」重拾光輝。

巴西主帥 鄧加

軍規一大堆Fans都撐

據《聖保羅頁報》爆料，鄧加制訂咗一大堆新規條管實班巴西國腳，當中包括禁止球員喺國家隊宣揚政治傾向及宗教，亦唔准向任何媒體同私人顧問洩露軍情。不過呢啲都只係碎料，鄧加對球員衣着嘅要求仲嚴格，Cap帽、耳環、拖鞋一律No Way。相信「森巴躉」都知尼馬最鍾意戴帽同耳環，睇怕「新比利」都要諗定轉Look先得喇！

除此之外，鄧加亦再次強調要禁慾，以前「森巴兵」跟住史高拉利有得曳曳，依家就No Way！鄧加又講明隨軍出征唔可以講太多電話，行李超重更加要自己畀番附加費，最離奇係佢規定任何球員唔可以早過隊長離開飯局，真係聽落都麻煩！不過佢老人家重掌帥印後連贏4場波，據講球迷都好撐鄧加鐵腕治軍。

堤亞高施華丁父憂

巴西下個月會同土耳其、奧地利拍跳，巴西足總搵咗曾經出戰1982年世盃嘅奧斯卡貝拿迪幫手，負責內部統籌事務，而新一輪名單入面繼續由隊長尼馬孭飛，賀芬咸鋒將羅拔圖法明奴、薩克達中場杜格拉斯哥斯達首獲徵召，周中歐聯鬥巴迪轟入5球嘅雷斯阿祖安奴亦都入選。不過傷愈重返國家隊嘅堤亞高施華尋日丁父憂，佢喺instagram「鋪」咗亡父張相，留言話感謝阿爸養育之恩。