網絡欺凌急增 法治淪為笑話

呢，私隱專員公署數字顯示，過去三年有關網絡欺凌嘅查詢同投訴個案不斷上升，由前年嘅二十八宗激增至舊年嘅四十八宗，增幅超過七成，今年更加飆升至八十一宗，都咪話唔嚴重。

最令人擔憂嘅係，佔領行動撕裂社會，網絡淪為互相攻擊嘅戰場，連前線警員亦成為受害者，部分子女嘅個人資料畀人擺上網，唔止受到欺凌，甚至受到恐嚇添。喂，警察只不過執行職務啫，關屋企人咩事？要受到咁嘅對待？香港仲有冇王法o架？

點解網絡欺凌愈來愈猖獗？除咗因為部分網民走火入魔，當局監管不力亦難辭其咎。唔講唔知，目前本港並無法例針對網絡欺凌，只有涉及誹謗或者不當收集個人資料等行為，受害者至可以向相關部門投訴，反觀海外好多地方都有法例禁止網絡欺凌。難為香港成日自詡法治之區，網絡欺凌居然零規管，簡直係笑話。

當然啦，世上沒有無緣無故嘅恨，近年社會日趨政治化，有人只問立場，不問是非，網絡欺凌又點會唔愈來愈嚴重吖。呢嗱，佔中鬧劇發展至今，民主爭取唔到，反而培養出一批暴民，搞到烏煙瘴氣，七國咁亂，特別係旺角，更加淪為九反之地，無法無天。有人話「愛與和平」已變質為「恨與暴力」，真係一啲冇講錯o架。

咪以為淨係一般市民法治意識薄弱呀，來自法律界嘅反對派政客都係一擔擔嘅咋。大律師公會日前批評有政黨背景人士呼籲群眾集體違抗法庭禁制令，點知政客惱羞成怒，反指大律師公會「毫無邏輯」、「唔知講乜」。咁就好笑嘞，大律師公會一向與反對派同聲同氣，依家只不過講出事實，政客就接受唔到，你話呢啲係乜嘢民主？又係乜嘢法治？

所以話啫，佔中鬧劇影響經濟民生事小，動搖法治根基事大。計太一叮話齋，家陣最緊要重建法治，無論網上抑或現實，無論黃絲帶抑或藍絲帶，有人犯法就要受到制裁，如果唔係，香港遲早淪為三不管地帶，令人避而遠之，叮！