係人都知，維多利亞港係香港最寶貴嘅天然資源，美景聞名遐邇，可惜當局一直未有好好保護，充分利用，搞到得物無所用，白白浪費美景，簡直係暴殄天物。
遲到好過冇到，經過多年來嘅研究復研究，港府終於決定成立海濱管理局，一站式負責海濱規劃、設計、發展、營運、管理同推廣等工作。第二階段公眾諮詢尋日展開，發展局仲舉行首場公眾論壇添，可惜市民就唔係咁踴躍嘞，數來數去只有十幾人出席。
即係咁，維港兩岸海濱全長七十三公里，港府認為大有潛力打造成世界級海濱，既可以帶來龐大商機，又可以提供休閒設施，更可以增加旅遊資源。但係由於過去欠缺專責部門統籌，海濱發展步伐緩慢，任何項目都要經過幾個部門審批，最快都要五年至可以成事，問你服未。
嗱，發展海濱講咗咁多年，至今只有約十分之一海岸線建有海濱長廊，而且好似斷橛禾蟲咁，既無規劃，又無特色。所以呢，對於成立海濱管理局嘅計劃，民意普遍支持，不過就希望公帑用得其所，唔好淪為大白象工程；而有人就擔心立法會拉布沒完沒了，成立海濱管理局嘅條例草案隨時要拖到二○一七年至通過。
市民嘅擔心唔係杞人憂天o架。海濱管理局營運模式將會參照西九管理局，集規劃、設計、發展同營運等大權於一身，如果港府未能吸取西九教訓，隨時重蹈用人不當、嚴重超支嘅覆轍，咁就弄巧反拙嘅喇。大家都知，港產官僚做嘢一向甩甩漏漏，例如舊年啟用嘅將軍澳南海濱長廊咁，一場颱風就搞到欄杆倒塌、路面損毀、石壆移位，好像豆腐渣工程咁，簡直丟架。
再講吖，今時今日香港高度政治化，周圍立立亂，尤其係佔領行動磨爛席，唔知幾時至收科，而反對派議員更揚言發起全面不合作運動，誓要癱瘓政府運作，喺咁嘅政治氣氛下，海濱管理局必定好事多磨，就算唔跪低，亦要一拖再拖，如果二○一七年真係能夠成事，都算執到喇。
正如有人話齋，唔到香港，唔知文革仲未結束。社會內鬥內耗，陷於政治泥沼不能自拔，政客為反對而反對，為拉布而拉布，根本冇人關心經濟同民生。港府聲稱要將維港兩岸打造成世界級海濱喎，講就易咯，做唔做得到仲要睇過至知吖，叮！
第一手消息請下載on.cc東網
