「哨牙蘇」騎呢回歸!時隔108日,蘇亞雷斯首次喺正式賽事披甲,尋日凌晨披上國家隊戰衣造訪沙特阿拉伯,冇乜狀態嘅「阿蘇」仍然盡顯身價,逼到對手擺烏龍,可惜烏拉圭最終喺呢場友賽被逼和1:1。之不過最頂癮嘅,係「阿蘇」昨仗踢踢吓突然人有三急,要衝離球場去廁所,最瘀係佢想返成名地晏菲路球場領歐洲金靴獎,又想謝拉特捧場,但都一一畀「紅軍」同「謝四」拒絕,得恩師杜格利殊最好心肯做頒獎嘉賓咋,陰功!

蘇亞雷斯(左)復出首場國家隊賽事表現搶鏡。(美聯社圖片)

烏拉圭前鋒蘇亞雷斯自從世盃咬人事件之後,昨仗首度為烏拉圭出戰並正選上陣,雖然咁耐冇落過場踢正式比賽,但佢依然係嗰位人見人怕嘅「蘇神」,繼續係場上嘅主角,佢喺換邊後接應罰球,球不着地凌空抽射中柱再反彈對方守衞入網,幫烏拉圭領先1:0,「阿蘇」踢到70分鐘就被換出,而烏拉圭就臨天光瀨尿,喺90分鐘畀對方嘅夏沙斯追平1:1完場。

復出首戰半場「開大」

雖然「阿蘇」最尾都做唔到贏波功臣,又喺比賽中途想「開大」,急到要問准球證離場「解決」,不過都無損「阿蘇」對於復出嘅興奮心情,佢喺賽後同隊友玩自拍,更作出深情表白:「好開心可以着番呢件帶畀我好多喜悅嘅波衫,我對呢件波衫嘅愛從來都冇離開過,烏拉圭﹗」

杜格利殊飛巴塞頒獎

「阿蘇」上季代表利物浦入咗31個聯賽入球,同C朗齊齊贏得歐洲金靴獎殊榮,咁威水自然想「衣錦還鄉」,重返晏菲路球場同球迷一同分享個獎,接受佢哋嘅歡呼,又想老死謝拉特捧佢場,但呢啲願望都一一落空,遭到利物浦「請食檸檬」,「阿蘇」惟有喺番巴塞隆拿接受獎項,而頒獎畀佢嘅嘉賓就係一手帶佢去「紅軍」嘅杜格利殊,都算係咁啦﹗