政治入侵校園 教育跌跌不休

呢，英國《泰晤士高等教育》日前公布本年度全球大學排行榜，本地高校旗艦嘅港大勉強維持第四十三位，比亞洲冧巴溫、全球排名廿三嘅日本東京大學，以及排名廿五嘅新加坡國立大學，足足輸成條街。中大排名更加大跌廿位，去到一百廿九位。

話時話，本港大學排名下跌都唔係咩新聞咯。有機構早前發表亞洲大學排行榜，連續三年榮登榜首嘅科大痛失一哥寶座，排名跌至第五，取而代之嘅又係新加坡國立大學，而南韓科學技術院亦爬過科大頭，升上第二位。香港高校嘅表現好似王小二過年，一年不如一年，令人搖頭嘆息。

香港嘅大學點樣至可以停止跌勢呢？調查機構係咁講嘅，本港高等教育界一定要把握同內地聯繫嘅優勢，並發揮國際化、融合中西特色嘅角色，只有咁樣至可以維持國際地位。冇錯，香港係中西文化薈萃之地，更加係國家嘅南大門，條件的確得天獨厚，不過咁喎，搞教育唔係得把口，而係要投入大量資源，偏偏守財奴政府欠缺承擔，優勢再多都盞嘥氣啦。第樣唔講，淨係本港大學入學率長期處於低水平，比好多發展中地區都不如，更遑論發達地區嘞。

仲有吖，港府對高校科研嘅支持一向葉公好龍，所有大學科研經費加埋都唔及內地一間普通大學，講出嚟都冇人信。教育界人士多年來不斷要求港府增加投入，只可惜你有你講，佢有佢做守財奴，大學排名唔插水至奇喇。

其實政府冇承擔都未算最大鑊，最大鑊係今時今日社會泛政治化，年輕人愈來愈激，依家仲學人搞乜鬼嘢佔領街頭。好嘞，有啲人無心向學，專搞抗爭，佢哋就話求仁得仁啫，至弊係連有心向學嘅都被連累埋呢，激到有家長怒吼「畀條路返學」。所以話啫，新加坡教育鍊贏香港，唔係冇道理o架，你哋沉迷政治鬥爭，人哋就一心一意謀發展，唔贏你都冇天理啦，吓話。

嗱，咪話太一叮唔警告，政治入侵校園，老師搞政治，學生唔讀書，再咁亂落去，唔單止大學冇運行，中小學幼稚園一條龍沉淪都似，香港仲憑乜嘢同人哋爭吖，叮！