尋日講到「佔中」行動搞到香港冤崩爛臭，製造大量垃圾，查實佔中破壞力驚人，呢啲只係小兒科咋。呢嗱，「十一」黃金周本來係旅遊業大賺人仔嘅時候，點知佔中橫空殺出，嚇到內地旅客望而卻步，業界嗌晒救命，問你怕未！

先睇吓旅遊業到底有幾大鑊，政府數字顯示，受佔中影響，「十一」黃金周內地旅客不升反跌，單係首兩日來港嘅內地旅客整體減少咗百分之一點七，個人遊旅客更加大跌百分之六點四，仲未計部分內地省市暫停赴港旅行團嘅影響。有導遊工會話，「十一」煙花因佔領行動取消，近三十個內地團跟住取消，加上有唔少旅客退團，搞到班從業員「無工開，無飯食」，真係喊得一句句。

一損俱損，旅遊業唔掂，零售、酒店、飲食等服務行業都咪使旨意有運行。好似主打個人遊生意嘅金舖咁吖，估計有五十間近日被迫閂門，約千名售貨員受影響，年底花紅至少唔見一半；有藥房更加話一日做少幾十萬生意，呢筆數都唔知向邊個追吖。

唉，人哋出嚟旅遊都係想輕鬆吓啫，家陣香港七國咁亂，四圍好似打仗咁，容乜易沙塵滾滾，殺錯良民o架？所以咯喎，唔單止內地旅客買你怕，澳洲、新加坡同加拿大等國家亦對香港發出旅遊警示，建議國民推遲行程。再咁亂落去，香港遲早淪落到伊拉克、敍利亞咁，人人聞之色變嘅咋。

講真，近年香港對內地旅客嘅吸引力已經愈來愈細，早就唔係佢哋嘅首選目的地，家陣佔中爆發，簡直雪上加霜。嗱，本地旅遊景點十年如一日，來來去去三幅被，邊有新鮮感吖。仲有喎，中港矛盾日益尖銳，激進團體郁吓就「驅蝗」、郁吓就「拖篋」，辱客醜聞不斷，正所謂此處不留人，自有留人處，世界上好玩好客嘅地方多的是，內地旅客大把選擇，無必要嚟香港貼錢買難受啫，吓話！

唔知大家仲記唔記得，近排一個七千人內地旅行團浩浩蕩蕩操去洛杉磯，每人平均使超過一萬美元，山姆大叔笑到見牙唔見眼，連市長都出動埋迎客吖。人哋就對財神爺無任歡迎，我哋就趕客無所不用其極，你話邊有人咁蠢o架。依家香港產業結構愈來愈單調，得番金融同旅遊叫做撐得住，連旅遊業都冧埋，大家實行食穀種都得咯。計太一叮話齋，驅蝗不如掃黃，趕客不如吸客，日嘈夜嘈搵到食嘅咩，叮！

第一手消息請下載on.cc東網iPhone/iPad/Android/Windows Phone Apps