政壇：搞搞政：民政總署發功免區會政治爭拗
佔領行動持續超過一個月，十八區區議會中，除咗受到佔領行動影響嘅中西區同油尖旺區區議會提過有關佔領行動嘅議案外，其他區議會就冇乜動作，點解區議會可以咁和諧？據聞原來係有民政事務專員勸喻建制派區議員勿提相關議案，以免逼泛民埋牆角、激起民怨，引發更多人參與佔領，或者民政事務總署署長陳甘美華同下屬發功，都係唔想區議會好似立法會咁，愈拗愈政治化。
設計圖片及對白
與建制達「不動議」共識
聞說，有民政事務專員同區內嘅建制派傾偈，叫大家唔好提出涉及佔領行動嘅動議，所以其他區域暫時未見辯論聲，只係由各區區議會正、副主席在內嘅區議員發聯署公開信呼籲佔領人士撤離。大部分嘅區議會原本都有默契，就係唔將政治議題擺上枱，但近年政治議題愈來愈惹火，區議會都討論過唔少政治議題，如之前國務院發表「一國兩制白皮書」時，十八區區議會建制派都就白皮書提出過相關議案，結果唔係節外生枝，泛民抗議、提出「惡搞」修訂，就係「拉布」式開會。最後，都拗唔出結果。
教訓在前，地區嘅民政事務專員咪開聲勸喻區內嘅建制派議員囉，若提出涉及佔領行動嘅動議，或會逼泛民埋牆角，反而為佔領行動火上加油，激發更多人上街參與佔領添。所以大家按兵不動，仲可以令事件降溫。
