高級公僕錦上花 肥上瘦下徒添怨

係咁嘅，薪常會日前公布每六年一度嘅公務員薪酬水平調查報告，結論係中低級公務員人工同私營機構相差唔大，唔使調整，而月薪八萬九至十萬三千元嘅非首長級高級公務員則跑輸私人市場百分之八，建議額外加薪百分之三喎。由於早前當局已經決定高級公務員加薪百分之五點九六，如果今次再接納薪酬水平調查報告，即係話三千四百名高級公務員總共可以加薪近百分之九，都咪話唔和味。

即係咁，薪常會話就話比較超過一百間私人機構嘅薪酬水平，其實未必反映到現實。係人都知，港府奉行所謂高薪養廉制度，高級公務員嘅人工拍得住英美領袖，依家話跑輸私人市場喎，實在好難唔令人質疑。再講吖，私人公司薪酬同表現掛鈎，人工愈高責任愈大，表現唔好隨時要執包袱，唔似得高級公務員，無論點樣犯錯，人工都照(才豆)吖。

退一步講，即使政府真係想為高級公務員加薪，以今時今日嘅政治氛圍，盞添煩添亂嘅咋。唔好唔記得，要落實加薪，除咗公務員事務局確認，特首會同行政會議通過，仲要過立法會財務委員會嗰關。家陣反對派喺議會搞不合作運動，財委會更加係拉布重災區，三堆一爐、創科局等撥款唔知拖到幾時，連公務員今年例行薪酬調整都未有機會處理，高級公務員想話額外加薪喎，真係發夢冇咁早。

仲有吖，不患寡而患不均，公務員加人工次次都係肥上瘦下，高層永遠加最多，基層早就滿肚火，之前就有紀律部隊因為咁退出薪酬趨勢調查委員會。試諗吓，前線執法人員喺佔領行動裏面承受最大壓力，經常被辱罵挑釁不特止，有啲連家人都被起底，而坐冷氣房嘅管理層人工就三級跳，唔嬲就假咯。

所以話啫，肥上瘦下固然製造分化，而雨露均霑又冇可能，真係加又死唔加又死。薪常會喺風頭火勢嘅時候拋隻燙手山芋畀政府，講得好聽係添煩添亂，講得難聽直頭係靠害。咪話太一叮唔提醒，佔中危機未除，社會躁動不安，管治瀕臨崩潰，呢啲先至係急需解決嘅問題，至於高級公僕加薪咯喎，諗都唔好諗吖，叮！