佔領阻住地球轉 稚童復課也受罪

呢，中西區同灣仔區幼稚園停課多日之後，尋日正式復課。雖然校園運作大致回復正常，但返學放學嘅交通問題，簡直係家長同小朋友嘅噩夢，諗起都怕怕。由於佔領行動死唔斷氣，港島交通幹道受到嚴重影響，大家都預咗路上有阻滯，所以好多家長都帶小朋友提早出門，或者改搭其他交通工具，點知路面情況實在太差，一樣失晒預算，好多學童遲大到。

有家長訴苦話，仔仔平時坐校車返學，尋日驚遲到，佢提早一粒鐘，親自帶仔仔去幼稚園，由港島東先坐港鐵到中環，再轉的士，前後用咗成個鐘，好彩趕得切喺打鐘前到幼稚園。上得到車，趕得到上堂，已經算行運喇，有位住西區嘅家長就冇咁好彩嘞，預早二十分鐘出門，但等極都唔見小巴，惟有改搭的士，誰知截的士都唔容易，試過好不容易截到一架，司機居然話路面塞車拒載，搞到佢踢晒腳。

雖然話拒載屬於違法，但又唔完全怪司機嘅。嗱，全港交通要道打晒蛇餅，車龍長達十幾二十公里，分分鐘送完乘客出唔返嚟。生意本來已經大受影響，再塞多一劑，真係搵埋都唔夠畀車租油錢o架。講番幼稚園復課呢筆吖，有校車遲足成粒鐘至抵達校園，有幼稚園除咗提早開校車，仲提醒家長預先為子女着好尿片褲再出門，以免路上人有三急，搞到一褲都係。你話嘞，咁搞法家長唔火滾至奇喇。

稚童無辜，何堪受罪！復課本來係開心事，因為交通擠塞，搞到精疲力盡，冇晒心機，請問班佔領人士，你哋搞「民主」冇問題，但唔好阻住地球轉得唔得？唔好搞到小朋友得唔得？萬一出咗事，好似有學童走失，甚至受到傷害咁，責任你哋孭得起咩！

話時話，雖然佔領行動退緊燒，但時有反覆，所引發嘅後遺症亦有排發作，社會只會愈來愈亂，直到徹底玩完。路障一日唔搬走，交通一日唔全面恢復，香港冇可能回復正常秩序，受傷害嘅點止學童同家長，仲有香港嘅未來。太一叮喺度正告嗰啲唯恐香港不亂嘅幕後黑手，呢條數，港人遲早要你哋埋單，叮！