楊華勇（右一）及莊菲娜（左一）抱住女兒Jazlynn及兒子Jazton齊扮蝙蝠俠。
中華廠商聯合會（廠商會）會董楊華勇（Johnny）每逢大閘蟹當造季節，都喺清水灣大宅擺下豪門宴，請廠商會青委一班手足拆蟹狂歡，今年撞正萬聖節，宴會當晚，楊家大宅迎來四十幾名嘩鬼，各人扮鬼扮馬應節，Johnny及太太莊菲娜（Fiona）帶兩名子女玩埋一份，變身蝙蝠俠家庭，溫馨到極。
當晚出席的包括青委主席張永鴻、副主席王詩雅等人，扮蜘蛛俠的常務會董黃家和兒子黃浩鈞（Howard）就同太太Iris及囡囡Olive一齊出席。當晚最受歡迎的造型非哈利波特莫屬，因為有多人不約而同扮成哈利，會董莊家彬（Albert）都穿上斗篷及戴上圓形眼鏡，加上魔法棒，造型唯妙唯肖。最搞笑係其中一名扮小哈利的小朋友，成晚黐住Albert多過跟自己父母，搞到Albert都有啲受寵若驚。
當晚菜式除咗肥美大閘蟹外，廚藝了得的Fiona就親自下廚炮製拿手小菜，包括蚵仔煎、炸五香卷及魚丸蘿蔔湯等福建菜，仲有客家名菜梅菜扣肉。
第一手消息請下載on.cc東網
