政府熱線如虛設 年中無休大隻講

嗱，政府成日宣傳1823可以為市民提供一站式查詢及處理投訴服務，可惜事實啱啱相反。有市民形容，次次打去都冇人聽，遊完一輪花園就叫你錄音，但係錄完又冇人覆，都唔知當局係咪真係收到市民意見，係咪真係會處理。最搞笑嘅係，以前打去部門一問就有人答覆嘅查詢，依家打去1823反而仲麻煩，即使偶然有真人接聽都要搞好耐至知發生咩事，然後又要等部門慢慢了解再覆，左拖右拖，費時失事，你話係咪阿茂整餅，冇嗰樣整嗰樣吖。

咪以為熱線電話形同虛設係小事呀，正如立法會議員話齋，市民投訴政府部門本來已經一肚氣，家陣連電話都打唔通，仲唔谷爆咩。咁又係呀，1823係政府面向市民嘅前線服務，「門常開」居然變成「門常關」，再咁落去，市民對政府失晒信心，隨時影響管治，唔係講玩o架。

所以話啫，政府熱線冇人聽，後果可大可小，絕對唔止等到頸長咁簡單。舊年之嘛，有市民行山時驚見疑似巨鷹陳屍水道，拿拿臨打去熱線反映，結果打極都唔通，於是乾脆報警，點知警方一樣要打畀1823處理，而最神奇嘅係，今次連警方都冇面畀，結果拖咗三日至由漁護署跟進，唔使問阿貴，鷹屍已經不知所終。你知啦，內地禽流感疫情揮之不去，冇出事都算好彩咯。

計太一叮話齋，1823熱線被打爆，搞到形同虛設，歸根究柢都係政府服務每況愈下所造成。好簡單，如果唔係官僚敷衍塞責，施政烏龍百出，市民唔通食飽飯冇嘢做，走去玩電話咩？一句到尾，政府服務一日唔改善，設立幾多熱線電話都係嘥氣o架咋。

講多無謂，行動最實際，港府官僚開口埋口想市民所想，急市民所急，講就天下無敵，做就有心無力。太一叮真係諗極都唔明，特區政府大事就話做唔到啫，連設立熱線電話接受市民投訴咁簡單嘅事都做到甩甩漏漏，問你服未。其實，只要請多幾個人接聽電話就可以解決問題，舉手之勞啫，咁都關人個關，擺到明當市民冇到喇，叮！