佔領人者必被佔 多行不義必自斃
天道循環，報應不爽。作為佔中行動總舵主嘅壹淫媒主席淫賤黎，成日鼓吹佔領呢度佔領嗰度，甚至不惜赤膊上陣帶頭佔領，好嘞，家陣終於自己受番晒。呢，位於將軍澳嘅壹淫媒總部，連日被大批憤怒示威者通宵佔領，阻撓報紙出版，搞到淫媒要出動吊臂車將報紙運走，狼狽不堪。
嗱，睇番今次佔領淫媒行動，將佔中套嘢學到十足十。你有黃絲帶咩，我有藍絲帶；你發動老弱婦孺，我亦照辦煮碗；你搭篷準備長期抗戰咩，我照跟可也，睇吓淫媒大樓外嗰列帳篷陣，幾壯觀o架。而最精彩嘅係，當工人準備將爛果報運出，示威者攔阻貨車駛入，只准工人以人手搬運報紙，又要檢查車輛，證明唔係爛果報先至放行。係咪覺得呢幕似曾相識呢？無錯喇，圍政總嗰班佔領人士，無論警察運送物資，抑或白車入去救人，都要先經過佢哋檢查。以子之矛攻子之盾，簡直大快人心！
成日話群眾眼睛雪亮，真係一啲都冇講錯o架。佔中搞到七國咁亂，天怒人怨，講到尾都係淫賤黎喺背後搞搞震。年輕人滿腔熱誠但涉世未深，就話一時間畀佢蠱惑到啫，廣大市民幾咁精明至得o架，對於淫賤黎嘅鬼蜮伎倆，大家早就忍無可忍，老實講，拖到依家至開佢波，已經嫌遲咗少少咯。
淫媒言必稱公民抗命，造反有理，輪到自己被抗命咯喎，佢就氣急敗壞，居然惡人先告狀，抹黑示威者收錢做嘢喎。咁就好笑嘞，佔中就係自發行動，圍你就係僱傭兵，呢啲到底係咩邏輯吖？其實，來說是非者，便是是非人，示威者有冇收錢就唔知，佔中搞手同政客係淫賤黎同佢主子養大嘅就係人都知。呢，再有秘密文件爆料，揭發職工盟十幾年嚟一直收受美國國家民主基金會捐贈，金額超過一千三百萬元。邊個先係收錢做嘢，畫公仔唔使畫出腸啦啩。
最離譜嘅係，佔中阻住地球轉，害到商舖雞毛鴨血，淫賤黎翹埋雙手，視而不見，到自己受影響就鬼殺咁嘈，又向法庭申請禁制令，又呼籲警方執法。喂，警方當初執法嗰陣，你唔係話暴力打壓示威者嘅咩？有事就差人，冇事就衰人，乜都你講晒啦。
都係孔夫子講得啱︰始作俑者，其無後乎。佔領淫媒只係「甜品」咋，之後嘅索賠潮至係「主菜」。冤有頭債有主，呢筆數向邊個追？梗係幕後黑手淫賤黎啦，叮！
