英格蘭「皇帝兵」玩殘上盤客！昨晨上演嘅歐國盃外圍賽，英格蘭喺E組雖然人多打人少，但最終都只係靠朗尼入波，1:0險勝魚腩愛沙尼亞，上盤客一殼眼淚。領隊鶴臣賽後踢爆進攻核心史達寧開波前玩嘢，埋怨今季休息時間少要求唔落場，消息曝光後引起大批網民圍攻，史達寧亦寸爆反擊引發罵戰，搞到「三獅軍團」又內訌！

史達寧人仔細細就咁大牌，鶴臣呢鋪有排煩。（Getty Images圖片）

韋碧克（左）今場冇乜貢獻。（法新社圖片）

愛沙尼亞0:1英格蘭
史達寧（左）一落場就搏到罰球，係英格蘭贏波功臣。（Getty Images圖片）

三獅兵今季披甲紀錄

以史達寧為進攻核心而重建嘅英格蘭，尋日作客弱旅愛沙尼亞，並冇派呢位利物浦新星擔任正選，英格蘭果然冇晒板斧，即使對方主力卡拉雲下半場早段被逐，英格蘭依然係老鼠拉龜。鶴臣終於喺64分鐘換入史達寧，呢位19歲小將唔夠10分鐘就喺禁區邊博得罰球，並由朗尼操刀破網，全場射門22次嘅英格蘭就係憑呢球小勝1:0，贏得勁羞家。

鶴臣被批焗爆料 史達寧反寸粉絲

被批評收起史達寧嘅鶴臣，賽後接受BBC訪問嗰陣玩爆料：「熱身嗰陣史達寧同我講，佢覺得好攰，希望今場可以休息唔踢，將一切責任推晒畀我係唔公平。」訪問一出立即激起球迷怒火，大量網民「轟炸」史達寧twitter，有人話「如果你再無啦啦話攰，唔該死去代表牙買加」、「我19歲嗰陣一星期打3場欖球都唔會攰啦！」

史達寧亦唔係人咁品，佢轉載多段批評言論後，寸爆留言：「我依家喺返屋企途中，仲聽緊《原諒我係凡人》呢首歌」，更加引嚟網民爆粗還擊！事實上19歲嘅史達寧唔單止係全隊最年輕，今季上陣時間亦唔及加利卡希爾（見表），踢足全場嘅韋舒亞都只不過踢少佢15分鐘，後生細仔咁都話攰扭計唔踢，又真係好難講得通喎。

大佬朗尼上任後 4連捷零失球

好在英格蘭有「福星」朗尼坐鎮，自從佢做咗英格蘭隊長後，「三獅軍」錄得4連勝兼零失球，今場入波亦係佢喺英格蘭99次上陣累積第43球，下場百戰有望追平或超越格里夫斯嘅44球，躋身英格蘭史上3大士哥拿！至於今場扭傷足踝退下火線嘅韋碧克，鶴臣就話佢傷勢輕微，應該唔影響今個星期聯賽上陣。